ڈھاکا(پاکستان پوائنٹ نیوز20۔نومبر2017ء) قومی ٹیم دے فاسٹ باؤلر حسن علی بنگلا دیش پریمئر لیگ دے اپنے پہلے ای میچ وچ چھا گئے نیں۔ تفصیل مطابق ون ڈے رینکنگ وچ ٹاپ پوزیشن سنبھالن والے حسن علی کُجھ دن پہلاں ای بنگلا دیش پریمئر لیگ وچ رلت لئی ڈھاکا پہنچے سن تے اج اوہناں دی ٹیم میلا وکٹورینز لیگ وچ ٹاپ پوزیشن اُتے موجود ڈھاکا ڈائنامائنس دے مقابل آئی۔
ڈھاکا ڈائنامائنس دے کپتان شکیب الحسن نے ٹاس جِت کے پہلے بیٹنگ دا فیصلاکیتا پر حسن علی نے ایون لوئیس تے مہدی معروف نوں اکواوور وچ بولڈ کر کے ڈھاکا دی ٹیم نوں اوکڑاں وچ پا دتا، ایس موقعے تے سنیل نارائن نے لیجنڈری سری لنکن بلے باز کمار سنگاکار نال رلکے ڈھاکا دی ٹیم دا سکور اگانہ ودھایا۔ اک موقعے اُتے ڈھاکا دی ٹیم نے 12.4اوورز وچ 104سکور کر لئے سن تے انج لگ رہیا سی کہ ڈھاکا اپنے مِتھے اووراں وچ 180سکور تیکر پہنچ سکدی اے پر کمار سنگاکار دے آؤٹ ہوندے ای حسن علی نے اننگ دا نقشہ بدل دتا۔
اوہناں نے مصدق حسین‘ محمد صدام تے ابو حیدر نوں بولڈ کر کے 3.3اوورز وچ 20سکور دے بدلے اپنیاں 5وکٹاں پوریاں کیتیاں۔ اوہ بنگلا دیش پریمئر لیگ دے چالو سیزن دوران اک اننگ وچ 5شکار کرن والے پہلے باؤلر نیں جدکہ اپنے سارے شکاراں نوں بولڈ کردے نال ای اوہ ٹی ٹونٹی کرکٹ دی تواریخ وچ ایہ کارنامہ انجام دین والے دوجے باؤلر بن گئے نیں۔ایس توں پہلاں بنگلا دیش دے روبیل حسین نے 2010وچ میرپور دے مقام تے ایہ اعزاز حاصل کیتا سی۔
