لاہور(پاکستان پوائنٹ نیوز13۔اکتوبر2017ء) پاکستان وچ گلی محلے دے بال گیند بلا پھڑے کرکٹ کھیڈدے نظر آؤندے نیں تے اوہناں وچوں ہر بال دی ایہو خاہش ہوندی اے کہ اوہ ٹاپ لیول اُتے کرکٹ کھیڈ کے پاکستان دا ناں روشن کرے پر اوہناں وچوں وڈی گنتی دا ایہ خاب کدی پورا نہیں ہوندا۔ ایہناں مُنڈیاں وچوں اک سرگودھا دا رکشہ ڈرائیور محمد نوید سی جو روز رکشہ چلان دے بعد ملن والے ویہلے ویلے اُتے کرکٹ دی پریکٹس کردا سی۔
محمد نوید اپنے شہر وچ ہون و الے لاہور قلندرز رائزنگ سٹارز دے ٹرائلز وچ سلیکٹ نہیں ہویا پر اوہ اک وار فیر ٹرائلز دین لیہ پہنچیا پر اوتھے وی منتخب نہ ہویا‘ ایہدے مگروں اوہنے بہاولپور وچ ٹرائلز دتے پر اوتھے وی اوہدی قسمت نے اوہدا ساتھ نہ دتا۔ نوید نے ہمت نہ ہاری تے فیصل آباد گیا جتھوں آخیر اوہنوں موقع مل گیا۔سرگودھا دی ٹیم دے کُجھ کھڈاری اوور ایج ہوئے تے نوید نوں سکواڈ وچ شامل کر لیا گیا۔
اوہنے اپنی ٹیم لئی پرفارم کیتا تے فائنل وچ اوپننگ کر کے میچ وننگ پرفارمنس دتی جہدی وجہ توں اوہنوں سڈنی جان لئی سلیکٹ کر لیا گیا۔ محمد نوید دا کہنا سی کہ کرکٹ کھیڈ کے ملک دا ناں اُچا کرنا میری سبھ توں وڈی خاہش سی تے لاہور قلندرز نے اوہنوں ایہ موقع دتا اے جہدے اُتے میں بہت خش آں۔ محمد نوید مطابق اوہ روز 6توں 7گھنٹے رکشہ چلان مگروں پریکٹس کردا اے۔
