لاہور(پاکستان پوائنٹ نیوز20۔ستمبر2017ء) پاکستان سپر لیگ دے تیجے ایڈیشن وچ غیر ملکی کھڈاریاں دی ساہمنے آن والی لسٹ وچ کوئی وڈا کھڈاری نہیں۔ پی ایس ایل دے تیجے ایڈشن لئی جنوبی افریقا دے لیگ سپنر عمران طاہر تے افغانستان دے لیگ سپنر راشد خان نوں پلاٹینم کٹیگری وچ رکھیا گیا۔ بُہتے غیر ملکی اوہی کھڈاری نیں جو پچھلے ورھے رلتی ہوئے سن جدکہ نویں لسٹ فرنچائز نوں گھل دتی گئی اے۔
فروری وچ ہون والے ٹورنامنٹ وچ انگلینڈ تے جنوبی افریقا دے کسے کھڈاری دی رلت دا کوئی امکان نہیں اے جدکہ آؤندے سال پی ایس ایل 3وچ نویں ٹیم ملتان سلطان وی حصہ لوے گی۔ وسیلیاں دا کہنا اے کہ 30ستمبر تیکر پچھلے ورھے دی 20کھڈاریاں دی لسٹ اے تے ہر فرنچائز نوں 10کھڈاریاں نوں برقرر رکھنا تے 10نوں ریلیز کرنا پئے گا۔ ایہناں 50کھڈاریاں وچوں پہلا آپشن نویں فرنچائز سلطان ملتان نوں دتا جائے گا‘ اوہ 50وچوں 10کھڈاریاں دا چناؤ کرے گی جدکہ باقی 10‘10کھڈاریاں دا چناؤ ڈرافٹنگ راہیں ہوئے گا۔
ہر ٹیم پلاٹینیم‘ ڈائمنڈ تے گولڈ کٹیگری نال 2,2سلور نال 3تے ایمرجنگ کٹیگری نال اک کھڈاریاں نوں ریلیز کرے گی تے اینے ای نویں کھڈاریاں نوں ڈرافٹنگ راہیں لئے گی۔ غیر ملکی کھڈاریاں لئی سمجھوتے وچوں دوجے مرحلے وچ لاہور تے کراچی جا کے میچ کھیڈن دی شق رکھی جائے گی۔
