پی ایس ایل کرپشن سکینڈل وچ وی بھارتی ہتھ ہون دا انکشاف

پی ایس ایل کرپشن سکینڈل وچ وی بھارتی ہتھ ہون دا انکشاف

اسلام آباد(پاکستان پوائنٹ نیوز24۔جون2017ء) پاکستان سپر لیگ دے سپاٹ فکسنگ سکینڈل دے حوالے نال تحقیقات دوران انکشاف ہویا اے کہ پی ایس ایل سکینڈل وچ بھارتی ہتھ اے۔ وسیلیاں مطابق پاکستان سپر لیگ دے دوجے ایڈیشن وچ ساہمنے آن والے سکینڈل وچ مرکزی کردار اک بھارتی جواری دا اے۔ سکینڈل وچ ملوث ناصر جمشید نوں اک تیجا بندا ورت رہیا سی جہدے بھارتی جورایاں نال تعلقات سن تے اوہناں نے دبئی وچ ہون والے میچاں دوران کرپشن دا منصوبا بنایا۔

پاکستان سپر لیگ دے سپاٹ فکسنگ سکینڈل وچ ملوث ہون تے ناصر جمشید نوں برطانیا دی نیشنل کرائم ایجنسی نے گرفتار کیتا سی جتھے اوہناں اُتے الزام سی کہ اوہناں نے پاکستانی کھڈاریاں نوں کرپشن لئی اُکسایا۔ ناصر جمشید دے نال یوسف انور نامی بندے نوں وی 13فروری نوں گرفتار کیتا گیا سی پر بعدوں اوہناں نوں ضمانت اُتے چھڈ دتا گیا ۔ نجی ٹی وی دی رپورٹ وچ دسیا گیا کہ گرفتار ہون والا تیجا بندا اک برطانوی شہری اے جہنوں 23فروری نوں شیفلڈ توں گرفتار کیتا پر اوہدا ناں اجے ساہمنے نہیں آیا پر اک گل یقین نال آکھی جا سکدی اے کہ اوس بندے دا بھارتی جواریاں تے ناصر جمشید نال رابطا سی۔

تیجے بندے نوں ناصر جمشید دے لیپ ٹاپ تے موبائل فون توں ملن والیاں اطلاعواں دے نتیجے وچ گرفتار کیتا گیا سی تے اوہ بندا یس ویلے تفتیش دا مرکزی کردار اے۔