لاہور(پاکستان پوائنٹ نیوز23۔جون2017ء) پچھلے دِنا ای آئی سی سی چیمپئنز ٹرافی دے فائنل وچ بھارت نوں ہرا دین والی قومی کرکٹ ٹیم دے کپتان سرفراز احمد دے ہر تھاں چرچے ہو رہے نیں تے ہن سوشل میڈیا اُتے اوہناں دی مقبولیت دا مقابلا بالی ووڈ کنگ شاہ رخ خان نال وی کیتا جان لگا اے۔ تفصیل مطابق پاکستان نے18جون نوں نہ صرف چیمپئنز ٹرافی اپنے ناں کیتی بلکہ بھارت خلاف سبھ توں ودھ ون ڈے میچ جِتن والی ٹیم دا اعزاز وی حاصل کر لیا۔
پاک بھارت میچ نوں دوویں ملکاں دی لوکائی توں وکھ پوری دنیا وچ بہت اہمیت دتی جاندی اے تے اوہدی مثال ترک صدر رجب طیب اردوان دی سوشل میڈیا اُتے وائرل ہون والی تصویر اے جہدے وچ اوہ آفس سٹاف نال پاک بھارت میچ ویکھ رہے نیں۔ بھارتی لوکائی تے کرکٹ پنڈتاں نوں چیمپئنز ٹرافی دے فائنل وچ پاکستان دی جِت اجے تیکر ہضم نہیں ہو رہی اے، بھارت وچ ہن تیکر سوگ دی فضا برقرار اے۔
ایس توں وکھ بھارتی ٹیم دی ملک واپسی اُتے کسے وی ناخشگوار واقعے توں بچن لئی کھڈاریاں دی سکیورٹی سخت کر دتی گئی اے۔ دوجے پاسے پاکستانی ٹیم دے کھڈاریاں نوں ورھیاں مگروں خشی دا موقع دین والی ٹیم دے کپتان سرفراز دے گھر وی لوکاں دی آمد دا سلسلا جاری اے۔ سرفراز احمد دے گھر جمع ہون والا مجمع اینا وڈا سی کہ لوکاں نے سوشل میڈیا اُتے اوہدا مقابلا بھارتی سپر سٹار شاہ رخ خان نال کرنا شروع کر دتا اے۔ چیتے رہوے کہ اہم موقعیاں اُتے اکثر شاہ رخ خان دے گھر باہر ہزاراں دی گنتی وچ بھیڑ جمع ہو جاندی اے جو اپنے سٹار دی اک جھلک ویکھن لئی اُتاولی ہوندی اے۔بالکل اجیہا منظر کُجھ دن پہلے سرفراز دے گھر باہر وی ویکھن نوں ملیا۔
