برمنگھم(پاکستان پوائنٹ نیوز25۔مئی2017ء) مانچسٹر دھماکیاں مگروں قومی کرکٹ ٹیم دی انتظامیا نے کھڈاریاں دی سکیورٹی ودھان تے ہوٹل بدلن دا مطالبا کر دتا۔ تفصیل مطابق قومی ٹیم دے منیجر طلعت علی نے آئی سی سی حکام نوں آکھیا اے کہ مانچسٹر واقعے مگروں ٹیم دی سکیورٹی وچ وادھا کرن دے نال نال ہوٹل وی بدل کے ہور ٹیماں نال دوجے ہوٹل وچ رکھیا جائے۔ دوجے پاسے آئی سی سی وسیلیاں دا کہنا اے کہ مانچسٹر دھماکے مگروں آئی سی سی چیمپئنز ٹرافی لئی برمنگھم وچ موجود پاکستان کرکٹ ٹیم دی سکیورٹی وادھا دتی گئی اے۔
چیتے رہوے کہ پیر دی رات مانچسٹر وچ ہون والے کنسرٹ دوران دھماکے دے نتیجے وچ 22بندے ہلاک تے 50توں ودھ زخمی ہو ئے سن جہدے بعد آن والے مہینے انگلینڈ وچ شیڈول چیمپئنز ٹرافی تے ویمنز ورلڈ کپ دی سکیورٹی اُتے سوالیا نشان لگ گیا اے۔
