نویں ٹیسٹ رینکنگ جاری: اظہر علی دی ترقی، یونس تے مصباح دی پوزیشن ڈاﺅن

نویں ٹیسٹ رینکنگ جاری: اظہر علی دی ترقی، یونس تے مصباح دی پوزیشن ڈاﺅن

دبئی(پاکستان پوائنٹ نیوز15۔مئی2017ء) انٹرنیشنل کرکٹ کونسل (آئی سی سی) نے نویں ٹیسٹ رینکنگ جاری کر دتی، اظہر علی ویسٹ انڈیز خلاف چنگی کارکردگی وکھان کارن 7درجے ترقی کر کے 7ویں نمبر اُتے آگئے جدکہ مرد بحران، یونس خان تے مصباح دی پوزیشن ڈاﺅن، باﺅلرز دی لسٹ وچ کوئی وی پاکستانی ٹاپ ٹپ وچ تھاں نہ بنا سکیا۔ پر ویسٹ انڈیز خلاف چنگا کھیڈ پیش کرن والے یاسر شاہ ایس لسٹ وچ 13نمبر اُتے آ گئے نیں۔

تفصیل دے مطابق آئی سی سی ولوں جاری ہون والی تازا رینکنگ دے مطابق بلے بازاں دی لسٹ وچ آسٹریلین کپتان سٹیو سمتھ اُنجے ای پہلے نمبر اُتے نیں، نیوزی لینڈ دے کین ولیمسن دوجے، انگلینڈ دے جوروٹ تیجے، بھارت دے چتیشور پجارا چوتھے، بھارتی کپتان ویرات کوہلی 5ویں، جنوبی افریقا دے کوئنٹین ڈی کوک 6ویں، پاکستان دے اظہر علی 7ویں، آسٹریلیا دے ڈیوڈ وارنر 8ویں، جنوبی افریقا دے ہاشم آملہ نویں تے بھارت دے لوکیش راہول 10ویں نمبر اُتے نیں۔

پاکستان دے بابر اعظم ایس ویلے 98ویں پوزیشن اُتے موجود نیں، یونس خان نے دودرجے ہیٹھاں آ کے 16تے مصباح الحق نے اک درجہ گوا کے 21پوزیشن اُتے اپنا ٹیسٹ کیریئر ختم کیتا۔ باﺅلرز دی لسٹ وچ کوئی وی پاکستانی ٹاپ ٹین وچ تھان نہ بنا سکیا۔ پاکستان دے محمد عباس 17پوڑھیاں ترقی مگروں 44ویں نمبر اُتے آگئے جدکہ حسن علی 96ویں پوزیشن اُتے موجود نیں۔