لندن(پاکستان پوائنٹ نیوز13۔مئی2017ء) روایتی حریف پاکستان، انڈیا تے آسٹریلیا، انگلینڈ وچکار ہون والے میچاں دے سارے ٹکٹ وِک گئے۔ چیمپیئنزٹرافی 2017پہلی جون توں 18جون تک انگلینڈ اینڈ ویلز وچ کھیڈی جائے گی جتھے چار جون نوں روایتی حریف پاکستان تے انگلینڈ وچکار میچ کھیڈیا جائے گا جہدے سارے ٹکٹ پہلے ای وک گئے نیں۔ آئی سی سی ولوں دسیا گیا اے کہ انڈیا دے میچاں دے سارے تے انگلینڈ دے اک میچ دے ٹکٹ وِک گئے نیں جدکہ پچھلے اک ہفتے دوران 15ہزار ٹکٹ وِکے نیں۔
کھیڈ دی عالمی گورننگ باڈی نے دسیا کہ 15وچوں 8میچاں دے سارے ٹکٹ وِک گئے نیں تے ایس موقعے اُتے ای 2013دے ایڈیشن دے مقابلے بُہتے ٹکٹ وِکے نیں۔ بیان وچ دسیا گیا اے کہ ممکنہ طوراُتے سبھ توں بہتی ٹکٹاں دی منگ بھارت، پاکستان، انگلینڈ ، آسٹریلیا تے اووول وچ ہون والے 18جون نوں فائنل میچ دی اے۔
