لاہور(پاکستان پوائنٹ نیوز19۔اپریل2017ء) چیئرمین پی سی بی شہریار خان ویسٹ انڈیز خلاف ٹیسٹ سیریز مگروں انٹرنیشنل کرکٹ توں ریٹائرمنٹ دا اعلان کرن والے کھڈاری مصباح الحق نوں ڈائریکٹر کرکٹ نہ بناسکے۔ ڈومیسٹک سٹرکچر نوں بہتر بنان لئی جدید کرکٹ توں جانو کسے سابق پلیئر نوں لیان دی بجائے ہارون رشید دا تقرر کر دتا گیا۔ تفصیل دے مطابق چیئرمین پی سی بی شہریار خان ہمیشہ مصباح الحق دے حامی رہے نیں، اوہناں نے ٹیسٹ کپتان دیاں ملک لئی خدمتاں نوں سلاہندے ہوئے آکھیا سی کہ اوہ پڑھے لکھے تے چنگی شخصیت دے مالک نیں جدکہ اوہناں دی ریٹائرمنٹ مگروں اوہناں دے تجربے تے علم توں بھرپور فائدا چُکن لئی اوہناں نوں ڈائریکٹر کرکٹ آپریشن دا عہدا دیواں گے جس طرحاں انگلش بورڈ نے اینڈر یوسٹروس دیاں خدمتاں توں فائدا چکنا شروع کیتا اے۔
شہریار خان نے جدوں چیئرمین دی کرسی چھڈن دا اعلان کیتا تے مصباح الحق دی ڈائریکٹر دے طور اُتے تقرری وی ویلے توں پہلے دم دے گئی۔ای سی بی نے 40ورھیاں دے اینڈریوسٹروس دا تقرر کیتا سی پر دوجے پاسے پی سی بی وچ موجود دوجے گروپ نے 64ورھیاں دے ہارون رشید نوں ڈائریکٹر کرکٹ دے عہدے اُتے بٹھان دا منصوبا پورا کر لیا۔
