نویں دِلی(پاکستان پوائنٹ نیوز29۔مارچ2017ء) بھارتی وزیر داخلا راج ناتھ سنگھ نے پاک بھارت سیریز دے انعقاد دے امکان نوں رد کر دتا۔ اپنے اک بیان وچ راج ناتھ سنگھ دا کہنا سی کہ اجے دوویں ملکاں وچکار اجیہا ماحول نہیں اے کہ پاکستان تے بھارت کرکٹ کھیڈ سکن، جدوں وی تجویز آوے گی ایس معاملے نوں ویکھاں گے۔ چیتے رہوے کہ ایس توں پہلے بھارتی میڈیا رپورٹس دے مطابق بی سی سی آئی ولوں حکومت نوں پاکستان نال کرکٹ سیریز کھیڈن دے حوالے نال خط لکھیا گیا سی ۔
خط وچ آکھیا گیا سی کہ پاکستان بھارت نال دبئی وچ سیریز کھیڈن لئی تیار اے ایس لئی سانوں سیریز دی اجازت دتی جائے۔ وسیلیاں دا کہنا سی کہ جے بھارتی حکومت نے پاکستان نال کرکٹ سیریز دی اجازت دے دوتی تے فیر دوویں ملکاں وچکار ستمبر یاں نومبر وچ کرکٹ سیریز ہو سکدی اے۔
