لندن(پاکستان پوائنٹ نیوز23۔مارچ2017ء) فاسٹ باﺅلر محمد عامر نے لندن دے ہیتھرو ائر پورٹ اُتے روکے جان دیاں خبراں نوں بے بنیاد قرار دے دِتا۔ تفصیل دے مطابق سماجی رابطے دی ویب سائٹ ٹوئٹر اُتے اپنے پیغام وچ محمد عامر دا کہنا سی کہ اوہ اپنے گھر خیریت نال نیں، لوک مشہور ہون لئی کوئی ہور راہ لبھن، ائر پورٹ اُتے اجیہا کوئی واقعہ نہیں ہویا۔ چیتے رہوے کہ محمد عامر برطانیا وچ اپنے گھر والیاں نال چھٹیاں لنگھان لئی پچھلے دیہاڑے لندن پہنچے نیں جتھوں اوہ کُجھ دن مگروں ون ڈے سیریز وچ رلت لئی ویسٹ انڈیز جان گے۔
پچھلے دیہاڑے لندن وچ پارلیمنٹ باہر دہشت گرد حملے دے نتیجے وچ 5بندے ہلاک تے 40توں ودھ زخمی ہو گئے سن جہدے مگروں مقامی میڈیا نے خبر چلائی سی کہ محمد عامر نوں ہیتھرو ائر پورٹ اُتے روک لیا گیا اے، مقامی اخبار دے مطابق عامر تے اوہناں دی گھر والی برطانیا گئے تے ہیتھرو ائر پورٹ اُتے امیگریشن حکام نے اوہناں کولوں ادھا گھنٹہ پُچھ گچھ کیتی۔
