اسلام آباد(پاکستان پوائنٹ نیوز08۔مارچ2017ء) افغان صدر اشرف غنی دی اُچیچی دعوت اُتے پاکستان سپر لیگ دی فاتح پشاور زلمی دی ٹیم چالو ورھے مئی وچ افغانستان دا دورا کرے گی۔ ایس سلسلے وچ پشاور زلمی دے اونر جاوید آفریدی نے میڈیا نال گل بات کردے ہوئے دسیا کہ افغان نائب وزیر خارجا حکمت خلیل کرزئی نے اوہناں نوں فون اُتے صدر غنی ولوں پی ایس ایل فائنل وچ کامیابی اُتے مبارک باد تے افغانستان دے دورے دی دعوت دا پیغام پہنچایا تے اسیں افغان صدر دی دعوت قبول کر لئی اے۔
جاوید آفریدی نے دسیا کہ پشاور زلمی دی ٹیم چالو ورھے مئی وچ کابل دا دورا کرے گی جہدے وچ شاہد آفریدی سنے سارے وڈے کھڈاری وی شامل ہون گے۔ جاوید آفریدی نے دسیا کہ پاکستان وانگ افغانستان وچ وی کرکٹ اک مقبول کھیڈ اے۔ پشاور زلمی دی ٹیم اپنیاں کوششاں نال افغانستان تے پاکستان نوں نیڑے لیا سکدی اے تے کرکٹ راہیں دوویں ملکاں دے لوک اک دوجے دے ہور نیڑے آسکدے نیں۔
