کوئٹہ،پشاور(پاکستان پوائنٹ نیوز04۔مارچ2017ء) پی ایس ایل دے لاہور وچ ہون والے فائنل لئی کرکٹ دے چاہیوان بڑے اُتاولے نیں۔ لاہور دے قذافی سٹیڈیم وچ پی ایس ایل دے فائنل لئی تیارںمکمل ہو گئیاں نیں جدکہ ایس موقعے اُتے سکیورٹی دے وی سخت تے فول پروف انتظامات کیتے گئے نیں۔ لاہور وچ فائنل ویکھن توں محروم رہ جان والے دوجے صوبیاں دے شہری مایوس نیں پر ہن بلوچستان دے شہر کوئٹہ تے خیبر پختونخوا دے شہر پشاور وچ وڈیاں سکریناں اُتے پی ایس ایل دا فائنل وکھان دا فیصلا کیتا گیا اے۔
بلوچستان دے وزیر اعلا ثناءاللہ زہری دا کہنا سی کہ اکبر بگٹی سٹیڈیم تے صادق شہید پارک وچ وڈیاں سکریناں لائیاں جان گیاں جدکہ سٹیڈیم تے پارک نیڑے کھان پان دے سٹال وی لائے جان گے۔ دوجے پاسے پشاور دی ضلعی انتظامیا نے وی وڈیاں سکریناں اُتے پی ایس ایل دا فائنل وکھان دا اعلان کر د ِتا اے۔ ضلعی انتظامیا دے مطابق جی ٹی روڈ اُتے لائیاں گئیاں وڈیاں سکریناں اُتے پی ایس ایل دا فائنل میچ وکھایا جائے گا۔
