دبئی(پاکستان پوائنٹ نیوز27۔فروری2017ء) پاکستان سپر لیگ وچ دو دن پہلے کوئٹہ گلیڈی ایٹرز تے پشاور زلمی دے میچ دوران بہت دلچسپ منظر ویکھن وچ آیا۔ سنسنی خیز میچ وچ پشاور زلمی نے گلیڈی ایٹرز نوں دو وکٹاں توں ہرا کے پہلے آف مرحلے توں پہلے پوائنٹس ٹیبل اُتے پہلے پوزیشن حاصل کیتی سی۔ خاص گل بوم بوم دی اننگ سی جہدے وچ اوہ 23گینداں اُتے 45سکور کر کے ناٹ آﺅٹ رہے۔
ایس میچ دے دوران کرکٹ چاہیواناں نوں اک کُڑی سکرین اُتے نظر آئی جو کھلونا خرگوش ہتھ وچ پھڑی پشاور زلمی دی جِت لئی دعا کر رہی سی۔ ویکھدے ای ویکھدے ذکر کیتی گئی کُڑی دی تصویر سوشل میڈیااُتے وائرل ہو گئی پر ایہ گل بہت گھٹ لوکاں نوں پتا ہووے گی کہ پشاور زلمی دی جِت اُتے رون والی کُڑی اصل وچ پاکستانی ٹیلی ویژن اُتے پشاور مرکز دی اداکارا تے مجمان نجیبہ فیض اے۔
نجیبہ ضلعی سطح اُتے پشاور زلمی دی نمائندا وی اے۔ سوشل میڈیا اُتے نجیبہ فیض دی تصویر بحث ہیٹھ اے۔دلچسپ گل ایہ اے کہ نجیبہ دے رون دا نوٹس ڈیرن سیمی نے وی لیا۔ پشاور زلمی دی جِت مگروں رمیز راجا نے وی ڈیرن سیمی نوں آکھیا کہ میچ بڑا دلچسپ رہیا، تہاڈی ٹیم جذباتی کھیڈ پیش کر کے کرکٹ چاہیواناں نوں روا گئی، جہدے اُتے ڈیرن سیمی دا جواب سی کہ چاہیواناں دے پیار اُتے فخر اے۔ میں روندی ہوئی نوجوان کُڑی نوں ویکھیا جہنے کھلونا خرگوش ہتھ وچ پھڑیا سی، اوہ خرگوش ساڈے لئی خش قسمت ثابت ہویا۔ ایس توں وکھ ٹو ئٹر اُتے وی لوکاں نے دلچسپ تبصرے کیتے۔
