کراچی(پاکستان پوائنٹ نیوز22۔فروری2017ء) پی ایس ایل وچ کرپشن دے الزام وچ معطل ہون والے کھڈاری شرجیل خان دا کہنا اے کہ اوہناں نے ایسا کوئی کم نہیں کیتا جہدے نال ملک و قوم دا ناں بدنام ہویا ہوئے، سارا کُجھ چھیتی ای ساہمنے آ جائے گا۔ تفصیل دے مطابق انٹرنیشنل کرکٹ توں معطلی مگروں 27ورھیاں دے اوپنر نوں یونائیٹڈ بنک لمیٹڈ (یو بی ایل) نے وی معطل کر دِتا اے، جہدے مگروں اج شرجیل خان یو بی ایل دے اک سینئر افسر نال ملاقات لئی گئے سن۔
ملاقات دے بعد میڈیا نال گل بات کردے ہوئے شرجیل خان دا کہنا سی کہ پی سی بی تے قانونی مشیراں نے میڈیا ساہمنے آ کے گل کرن توں منع کیتا اے، کوئی ایسا کم نہیں کیتا جہدے نال ملک و قوم دا ناں بدنام ہویا جائے۔ اوہناں دا کہنا سی کہ سارا کُجھ چھیتی ای ساہمنے آ جائے گا۔
