بالی ووڈ فلمسٹار کرینہ کپور دی نِکے بال لتھی فوٹو جعلی نکلی

بالی ووڈ فلمسٹار کرینہ کپور دی نِکے بال لتھی فوٹو جعلی نکلی

ممبئی(پاکستان پوائنٹ نیوز21۔دسمبر2016ء) بالی ووڈ فلمسٹار کرینہ کپور تے سیف علی خان دے گھر بال دی پیدائش ہوئی جہدے بعد سوشل میڈیا تے ہور میڈیا اُتے ایس جوڑے نوں ماں پیو بنن اُتے مبارکباں دین دا سلسلا شروع ہو گیا۔ رات ویلے کرینہ کپور دی اک نکے بال نال تصویر وی سوشل میڈیا اُتے مشہور ہوئی جہنوں اوہناں دے چاہیواناں نے سلاہیا۔ پر ہن بھارتی میڈیا دے مطابق سوشل میڈیا اُتے آن والی ایہ تصویر جعلی اے۔

بھارتی ٹی وی چینل اے بی پی نیوز نے کرینہ کپور تے سیف علی خان دے قریبی وسیلیاں توں ایس تصویر دی تصدیق کیتی جہدے اُتے اوہناں نے دسیا کہ میڈیا وچ آن والی تصویر نوں سافٹ ویئر دے ذریعے بنایا گیا اے۔ یاد رہوے کہ اجے تیکر کرینہ کپور تے سیف علی خان دے پُتر تیمور خان دی کوئی وی تصویر میڈیا نوں نہیں دِتی گئی پر اوہناں دے چاہیوان نِکے نواب نوں ویکھن لئی ڈاڈھے اُتاولے نیں۔