ممبئی(پاکستان پوائنٹ نیوز10۔نومبر۔2016ء) بھارتی ماڈل و اداکارا امن سندھو نے فلماں وچ کم دین دے بدلے غیر اخلاقی کم کرن اُتے مجبور کرن والے جعلی ہدایتکار دیپک مشرا نوں سر عام کُٹ دتا تے ویڈیو بنا کے سوشل میڈیا اُتے جاری کر دِتی۔ تفصیل دے مطابق بالی ووڈ وچ اداکاراں تے ماڈلز نوں فلماں وچ کم دا جھانسا دے کے جسم فروشی اُتے مجبور کرنا عام جہی گل ہوندی جا رہی اے تے نامور اداکاراں نوں وی کئی وار ہدایتکاراں تے فلمسازاں ولوں دھمکایا گیا اے جہدا کئی وار اعتراف اداکارا کنگنا رناوت نے وی کیتا اے پر ہن اک ہور ماڈل گرل نوں غیر اخلاقی کم کرن لئی مجبور کرن دا واقعا ساہمنے آیا اے۔
بھارتی میڈیا رپورٹ دے مطابق ماڈل گرل امن سندھو نوں دیپک مشرا نامی بندے نے ہدایتکاربن کے فلماں وچ کم کرن دی پیش کش کیتی تے نال ای رات لنگھان دا آکھیا جہدے اُتے ماڈل گرل نے اوہنوں ملاقات لئی مقامی ہوٹل وچ بلایا جتھے اوہنے جعلی ہدایتکار دی لوکائی ساہمنے دُھلائی کر دِتی۔ امن سندھو نے جعلی ہدایتکار خلاف پولیس وچ مقدما وی درج کرایا اے پر پولیس کسے قسم دی کارروائی توں پرہیز کر رہی اے جدکہ ماڈل گرل نے پورے معاملے دی ویڈیو وی بنائی اے جہنوں سوشل میڈیا اُتے جاری کر دِتا جہدے بعد اک نویں بحث شروع ہو گئی اے تے اداکارا دے ایس اقدام نوں ڈاڈھا سلاہیا جا رہیا اے۔ یادرہوے کہ امن سندھو کئی ڈراما سیریل وچ کم کر چکیاں نیں جہدے وچ ”نیلی چھتری والے“ کافی مشہور اے۔
