لاہور( پاکستان پوائنٹ نیوز07۔جولائی۔2018ء ) پی ٹی آئی چیئرمین عمران خان دی تیجی بیوی بشری بی بی دے سابق شوہر خاور مانیکا دے اداکارہ نور نال ویاہ دیاں افواہواں اُٹھیاں ، جیہناں نے اداکارہ نور نوں ڈاڈھا پریشان کردتا۔ نجی ٹی وی چینل نال گل بات کردے ہوئے نور بخاری نے ایہناں افواہواں نوں ر د کر دتا۔ اداکارہ نور بخاری نے آکھیاکہ ایس طرحاں دیاں خبراں فضول نیں۔
نجی ٹی وی چینل نال گل بات کردے ہوئے اوہناں دا کہناسی کہ ایس طرحاں دیاں خبراں وچ کوئی سچائی نہیں اے۔ میرے حوالے نال پہلے وی بہت ساریاں افواہواں گھم رہیاں نیں۔ پورے پاکستان دی ٹینشن اک پاسے تے میرے ویاہ دی ٹینشن اک پاسے اے۔ اوہناں دا کہنا سی کہ ساریاں نوں میرے ویاہ دی فکر اے۔ جدوں ویاہ کرنا چاہواں گی اوہناں لوکاں نال صلاح کراں گی جو میرے حوالے نال ایس طرحاں دیاں اوٹ پٹانگ خبراں کھلا رہے نیں۔
اوہناں دا کہنا سی کہ کوئی رشتہ ہے تے دسو پر اپنے دادے دی عمر دا نہیں بلکہ پُتر دی عمر دا۔اوہناں دا کہنا سی کہ تُسیں گھٹو گھٹ میری کلاس تے ویکھو۔ میں اپنی زندگی وچ بہت پرسکون آں الحمد اللہ تے ہمیشہ سکون وچ رہنا چاہنی آں۔ خاور مانیکا نال ویاہ بارے گل بات کردے ہوئے اوہناں نے مخولیا انداز وچ آکھیا کہ جے سبھ نوں میری ویاہ دی فکر اے تے ویاہ کروانا ای اے تے عمران خان نال کروا دیو۔
چیتے رہوے کہ روزیاں دے مہینے وچ عمران خان تے اوہناں دی گھر والی بشری بی بی عمرے لئی سعودی عرب گئے سن۔ جتھے بشری بی بی دی اداکارہ نور نال اک تصویر وائرل ہو رہی سی۔جیہدے مگروں سوشل میڈیا اُتے ایہ افواہواں گھم رہیاں سن کہ شاید بشری بی بی اداکارہ نور تے عمران خان دے سیکرٹری عون چودھری دا فیر ویاہ کروانا چاہندیاں نیں۔پر قومی اخبار دی رپورٹ وچ آکھیا گیا سی کہ بشری بی بی اپنے سابق خاوند نال اداکارہ دا ویاہ کروانا چاہندیاں نیں۔
