ریاض( پاکستان پوائنٹ نیوز01۔جون2018ء ) فیشن دے مشہور میگزین’ ووگ‘ نے اپنے عربی ایڈیشن دے جون دے شمارے نوں سوانیاں دے ناں کردے ہوئے سعودی عرب وچ سوانیاں نوں ڈرائیونگ دی اجازت ملن تے جنسی ہراساں کرن دے قانون دی منظوری دے حوالے نال ٹائٹل پیج اُتے سعودی شہزادی دی کار دی ڈرائیونگ سیٹ اُتے بیٹھی ہوئی تصویر چھاپ دتی اے۔ تفصیل مطابق پچھلے دو ورھیاں توں تیزی نال بدلدے ہوئے اسلامی ملک سعودی عرب وچ پہلی وار اک وار شہزادی مشہور فیشن میگزین ووگ دے عربی شمارے دے ٹائٹل پیج دی زینت بنی۔
سابق بادشاہ عبداللہ دی دھی تے تن بالاں ماں حیفا بنت عبداللہ السعود نوں ووگ رسالے دے شمارے دی زینت اوس ویلے بنایا گیا اے جدوں چالو مہینے سعودی عرب وچ سوانیاں پہلی وار ڈرائیونگ کردیاں وکھالی دتیاں۔ میڈیا رپورٹس مطابق فیشن میگزین دے ٹائٹل پیپج اُتے چھپی سعودی شہزادی دی تصویر دی خاص گل ایہ اے کہ اوہنوں 1990دے دہاکے دی مرسڈیز 450ایس ایل دی فرنٹ سیٹ اُتے بیٹھے ہوئے وکھایا گیا اے۔ تصویر وچ ویکھیا جا سکدا اے کہ سعودی شہزادی لیدر دے دستانے تے چِٹے رنگ دے عبائے وچ خوبصور ت لگ رہی اے۔پر دوجے پاسے فیشن میگزین دے ٹائٹل پیج اُتے ماڈل دی بجائے سعودی شہزادی دی تصویر چھپن اُتے لوکاں نے تنقید وی کیتی اے،جیہدے مگروں اک نواں جھیڑا پیدا ہو گیا اے۔
