ویاہ مگروں بالاں دی کرکٹ ٹیم بنانا چاہنی آں: پریانکا

نویں دِلی(پاکستان پوائنٹ نیوز30۔دسمبر2017ء) بالی ووڈ دی مشہور اداکارہ پریانکا چوپڑا نے اپنے ویاہ دے حوالے نال اہم گل کیتی اے، اوہناں نے آکھیا کہ ویاہ مگروں بالاں دی کرکٹ ٹیم بنانا چاہنی آں پر ایہدے وچ اک رکاوٹ اے۔ بھارتی میڈیا مطابق پریانکا چوپڑا نے کُجھ دن پہلے اک مقامی تقریب وچ رلت کیتی ۔ تقریب دوران اوہناں نے بالی ووڈ وچ پسندیدہ اداکاراں نوں نوازن ورگے مسئلے، نسل پرستی تے دیپکا پڈوکون دی فلم ’پدماوتی‘ بارے گل بات کیتی۔ مقبول تے کامیاب اداکارہ ہون مگروں وی پریانکا چوپڑا نے اجے تیکر ویاہ نہیں کروایا۔ جدوں اوہناں کولوں ایس بارے سوال کیتا گیا تے اوہناں نے ہسدے ہوئے آکھیا کہ میں ویاہ کرنا چاہنی آں تے ویاہ مگروں بالاں دی کرکٹ ٹیم بناواں گی۔