ممبئی(پاکستان پوائنٹ نیوز23۔دسمبر2017ء) بالی ووڈ اداکارہ زرین خان نے قومی ٹیم دے سابق کپتان و مشہور بلے باز شاہد آفریدی نال کسے وی قسم دے ’تعلق‘ دیاں خبراں نوں بے بنیاد قرار دے دتا اے۔ تفصیل مطابق شارجہ وچ ہون والی ٹی ٹین لیگ دوران زرین خان نوں خیبرپختونخوا فرنچائز دا سفیر بنایا گیا سی جہدے کپتان شاہد آفریدی سن، دوواں نے ایونٹ توں پہلاں اک اشتہار وچ وی اکٹھے کم کیتا جہنوں کئی لوکاں نے بہت پسند کیتا پر بعض لوک اجیہے وی سن جہناں نے ایس دوستی نوں نواں رنگ دیندے ہوئے اوہناں دے ویاہ دی دھم پا دتی۔
ہن زرین خان نے سوشل میڈیا ویب سائٹ ٹویٹر اُتے ایہناں افواہواں نوں بے بنیادتے فضول قرار دتا اے۔ اوہناں دا کہنا سی کہ میں پچھلے دناں اپنے تے شاہد آفریدی بارے سوشل میڈیا اُتے اک فضول پوسٹ ویکھی، آفریدی اک خاندانی تے شریف انسان اے تے میری لوکاں توں درخاست اے کہ اوہ ایس فضول پوسٹ اُتے نہ کوئی توجہ دین تے نہ ای اوہنوں کھلارن۔
