ممبئی(پاکستان پوائنٹ نیوز04۔اکتوبر2017ء) بھارت لبرل ازم دا پرچار کردا اے پر اوتھے ہندو انتہا پسندی وی عروج اُتے اے۔ مسلماناں سنے ہور اقلیتاں نوں مذہبی رسماں دی ادائیگی توں روکیا جانا معمول دی گل اے‘ ایتھوں تیکر بھارتی اداکار وی مسلماناں دیاں مذہبی رسماں نوں تنقید دا نشانہ بناندے رہے نیں۔ چالو ورھے اپریل وچ مشہور بھارتی پلے بیک سنگر سونو نگم دا اذان دے حوالے نال جھیڑوا بیان ساہمنے آیا سی۔
پر ہن مشہور اداکارہ کنگنا رناوت نے اذان دے حوالے نال تنقید کرن والے ناقداں دے مونہ بھن دتے نیں۔میڈیا نال گل بات کردے ہوئے کنگنا رناوت دا کہنا سی کہ مینوں ذاتی طور اُتے اذان نال محبت اے۔ جدوں اسیں ’تنو ویڈز منو‘ دی لکھنو وچ شوٹنگ کر رہے ساں تے مینوں 5ویلے اذان دی اواز سنائی دیندی سی جو میرے کناں نوں بہت سوہنی لگدی سی۔ مینوں انج لگدا سی کہ میں اپنے آپ نال گل بات کررہی آں۔اوہناں دا ہور کہنا سی کہ کوئی وی مذہی سرگرمی ہوئے مینوں پسنداے، مینوں مسجد وچ جانا چنگا لگدا اے تے میں ایہدے نال نال مندر تے چرچ وی جاندی آں۔
