عدالت وچ پیش نہ ہون اُتے ماڈل صوفیہ مرزا دے وارنٹ گرفتاری جاری

لاہور(پاکستان پوائنٹ نیوز03۔اکتوبر2017ء) ماڈل ٹاؤن کچہری دے جوڈیشل مجسٹریٹ احسن رضا نے عدالت وچ پیش نہ ہون اُتے فراڈ دے مقدمے وچ ملوث ماڈل صوفیہ مرزا دے ناقابل ضمانت وارنٹ گرفتاری جاری کردے ہوئے پولیس نوں حکم دتا کہ ملزمہ ماڈل صوفیہ مرزا نوں گرفتار کر کے آؤندی سنوائی اُتے عدالت وچ پیش کیتا جائے۔ عدالت وچ سمن آباد پولیس نے ملزمہ صوفیا مرزا خلاف درج مقدمے دا چالان پیش کیتا، پراسیکیوشن نے عدالت نوں دسیا کہ ملزمہ ماڈل صوفیہ مرزا فراڈ دے مقدمے وچ ملوث نیں تے اوہ لُکیاں ہوئیاں نیں، ماڈل صوفیہ مرزا نوں طلبی دے نوٹسز وی گھلے گئے نیں۔ عدالت نے دلائل سنن مگروں ماڈل صوفیہ مرزا دے ناقابل ضمانت وارنٹ گرفتاری جاری کردتے۔