ممبئی(پاکستان پوائنٹ نیوز16۔ستمبر2017ء) مشہور بالی ووڈ ادکارہ و سابق ملکہ حسن ایشوریا رائے دی دوست نے اوہناں دے پچھوکٹر تے کالج بارے دلچسپ انکشاف کیتا اے۔ اپنے حسن نال کروڑاں دلاں اُتے راج کرن والی ایشوریا رائے دی کالج دے زمانے دی دوست شیوانی نے دسیا کہ ایشوریا کالج دے دناں وچ اپنے حسن تے خوبصورتی کارن بہت مشہور سی۔ کالج دے مُنڈے اوہنوں ویکھن لئی کئی کئی گھنٹے گیٹ اُتے لین بنا کے کھلوتے رہندے سن۔
ایس توں وکھ ایشوریا اپنی پڑھائی نوں سنجیدہ نہیں لیندی سی۔شیوانی نے آکھیا کہ ایشوریا کالج دے دناں وچ عام لوکاں وانگ لوکل ریل گڈی اُتے سفر کردی سی۔ اسیں اکٹھے کالج جاندے ساں پر صورتحال اوس ویلے دلچسپ ہو جاندی سی جدوں راہ وچ کُڑیاں وی ایشوریا نوں ویکھن لئی کھلو جاندیاں سن پر ایشوریا ایہناں لوکاں ول دھیان نہیں دیندی سی۔
