ممبئی(پاکستان پوائنٹ نیوز01۔جولائی2017ء) جمعے دا دن پورے ہفتے دا آخری ورکنگ ڈے ہوندا اے۔ جمعہ آﺅندے ای نوکری کرن والے بندے سُکھ دا ساہ لیندے نیں کیونکہ ایہدے بعد اوہناں نوں ہفتہ وار چھٹی ہوندی اے۔ اکثر ویکھیا گیا اے کہ لوک جمعے دے دیہاڑ ای اپنے سارے کم نبیڑ لیندے نیں تاں جے چھٹی والے دن سکون کر سکن۔ اپنے خاندان نوں ویلا دے سکن یاں کوئی نویں فلم ویکھن۔
جے تُسیں فلماں دے شیدائی او تے تہانوں پتا ہوئے گا کہ بھارت وچ فلماں جمعے نوں ای ریلیز کیتیاں جاندیاں نیں۔ جے تُسیں سمجھدے او کہ ہفتے دا آخری دن ہون دی وجہ توں انج ہوندا اے تے ایہ گل غلط اے۔ بھارتی میڈیا مطابق انڈیا وچ جمعے دے دیہاڑے فلماں ریلیز کرن دا رواج بہت پرانا اے جو 60دے دہاکے وچ شروع ہویا سی۔ 1960وچ ریلیز ہون والی مشہور فلم’ مغل اعظم ‘دا شمار وی ایہناں فلماں وچ ہوندا اے جو جمعے نوں ریلیز کیتیاں گئیاں۔ فلم’ مغل اعظم‘ نوں 5اگست 1960نوں جمعے دے دیہاڑے ای ریلیز کیتا گیا سی۔ بھارتی میڈیا مطابق اصل وچ ہندو مذہب وچ جمعے دے دن نوں لکشمی دیوی نال جوڑیا جاندا اے۔
