کراچی(پاکستان پوائنٹ نیوز05۔جون2017ء) پاکستان دے مشہور گائیک عامر ذکی دے فوت ہون اُتے ٹی وی ہوسٹ وقار ذکاءنے سوشل میڈیا تے اک ویڈیو جاری کیتی۔ اپنی ویڈیو وچ وقار ذکاءنے عامر ذکی دے فوت ہون اُتے ہور آرٹسٹس دے رویاں نوں ڈاڈھی تنقید دا نشانا بناندے ہوئے آکھیا کہ علی حیدر تے حدیقہ کیانی ورگے آرٹسٹس نوں ایتھے ہونا چاہیدا سی۔ وقار ذکا نے آکھیا کہ عامر ذکی دی میت ایدھی ہاﺅس وچ اے تے اوہ کہڑے حال وچ پئی ہوئی اے میں تہانوں نہیں وکھا سکدا۔
وقار ذکاءدی ایس ویڈیو اُتے گلوکار علی حیدر نے اوہناں نوں تنقید دا نشانابناندے ہوئے آکھیا کہ میں تن ورھیاں توں امریکا وچ آں تے حدیقہ وی لمے چِر توں لاہور اے۔ تُسیں کراچی وچ او تے تُسیں کُجھ نہیں کیتا؟ ایہدے مگروں ہن عامر ذکی دے بھتیجے دا اک ویڈیو پیغام ساہمنے آ گیا اے۔ عامر ذکی دے بھتیجے دانیال سہیل نے سماجی رابطے دی ویب سائٹ فیس بک اُتے اپنے پیغام وچ آکھیا کہ سانوں وقار ذکاءدی اوس ویڈیو اُتے بڑا دُکھ ہویا، وقار ذکاءدی اوہ ویڈیو مگروں سانوں کئی لوکاں دے فون آئے۔
دانیال نے وقار ذکاءنوں تنقید دا نشانابناندے ہوئے آکھیا کہ جے تہانوں اینی ای فکر سی تے تُسیں کیوں عامر ذکی دے جنازے وچ نہیں آئے؟ دانیال نے واضح کیتا کہ عامر ذکی دی میت نوں ایدھی سرد خانے منتقل کیتا گیا سی۔ اوہناں دی میت نوں اوہناں دے بھتیجے زاہد نے ایدھی سرد خانے منتقل کیتا۔
