لاہور(پاکستان پوائنٹ نیوز16۔مئی2017ء) کوک سٹوڈیو وچ گلوکار راحت فتح علی خان نال ’آفریں آفریں‘ گانے والی نوجوان گلوکارا مومنہ مستحن نوں پچھلے دِنا ای ڈاڈھی شہرت ملی۔ اوہناں دی شہرت دی وجہ اوہناں دی مِٹھی تے سُریلی آواز اے۔ سوشل میڈیا اُتے مومنہ مستحن دا گانا تے اوہناں دی تصویر لَمے چِر توں وائرل ہوندی رہی تے ایہو وجہ اے کہ مومنہ مستحن سوشل میڈیا اُتے خبراں دی زینت بن رہیاں نیں۔
مومنہ مستحن دے چاہیواناں لئی چنگی خبر ایہ اے کہ مومنہ نے چالو مہینے روزیاں وچ وی نعت خوانی راہیں اپنی آواز دا جادو جگان دا فیصلا کیتا اے۔ وسیلیاں نے دسیا کہ مومنہ چالو مہینے قصیدہ بردہ شریف پڑھن گیاں۔ وسیلیاں مطابق قصیدہ بردہ شریف دی ایس ویڈیو وچ مومنہ مستحن نال شیراز اُپل وی ہون گے تے ایہ ویڈیو چالو ورھے روزیاں وچ ریلیز کیتی جائے گی۔ مومنہ مستحن دی ذکر کیتی گئی ویڈیو دی تصویری جھلک سوشل میڈیا اُتے گھم رہی اے جہنے مومنہ دے چاہیواناں وچ خشی دی لہر دوڑا دتی اے۔
