ممبئی(پاکستان پوائنٹ نیوز02۔مارچ2017ء) پاکستان سپر لیگ (پی ایس ایل) وچ سبھ ای اپنی اپنی پسند دی ٹیم نوں سپورٹ کر رہے نیں تے ہن بالی ووڈ اداکارا نرگس فخری نے وی پی ایس ایل وچ اپنی پسند دی ٹیم دا چناﺅ کر لیا اے۔ تفصیل دے مطابق 37ورھیاں دی امریکی نژاد بالی ووڈ اداکارا نرگس فخری پی ایس ایل وچ پشاور زلمی دی ٹیم نوں سپورٹ کر رہیاں نیں تے اوہناں نے ایس حوالے نال اک ویڈیو پیغام وی دِتا۔
پشاور زلمی دے چیئرمین جاوید آفریدی نے اپنے فیس بک اکاﺅنٹ اُتے اک ویڈیو شیئر کیتی جہدی وچ نرگس فخری دا کہنا سی کہ میں اپنی پسند دی ٹیم پشاور زلمی لئی نیک خاہشاں دا اظہار کرنا چاہندی آں تے خاص دعاواں میرے دوست جاوید آفریدی لئی وی، میرا پیار تے سپورٹ ایہناں ساریاں نال اے۔ یاد رہوے کہ پشاور زلمی دا اگلا میچ کراچی کنگز نال 3مارچ نوں ہووے گا تے ایہ مقابلا جِتن والی ٹیم 5مارچ نوں قذافی سٹیڈیم لاہور وچ ہون والے فائنل وچ کوئٹہ گلیڈی ایٹرز نال کھیڈے گی۔
