لال حویلی متروکہ وقف املاک دی ملکیت نہیں: صدیق الفاروق داانکشاف

لاہور(پاکستان پوائنٹ نیوز25۔جنوری2017ء) متروکہ وقف املاک بورڈ دے چیئرمین صدیق الفاروق نے لال حویلی بارے انکشاف کر دِتا۔ تفصیل دے مطابق صدیق الفاروق دا کہنا سی کہ لال حویلی متروکہ وقف املاک دی ملکیت نہیں اے۔ اوہناں نے آکھیا کہ لال حویلی نال جُڑی زمین اُتے قبضہ کیتا گیا اے جہنوں اسیں ہر حال وچ چھڈاواں گے۔ صدیق الفاروق نے عوامی مسلم لیگ دے سربراہ شیخ رشید نوں وی ہدایت کردے ہوئے آکھیا کہ شیخ رشید نوں چاہیدا کہ اوہ جذباتی بیان نہ دین تے لال حویلی نال جُڑی زمین توں اپنا قبضہ ختم کر دین، نہیں تے قانون اپنا راہ کڈھ ای لووے گا۔