اسلام آباد(پاکستان پوائنٹ نیوز25۔جنوری2017ء) ملک بھر وچ جِتھے پاناما لیکس تے شریف خاندان وچکار ارباں رُپئے مالیت دے تحفیاں دے وٹاندرے دا چرچا اے اوتھے ہن پچھلے دِنا ای اک ہور انکشاف ہویا اے کہ پی ٹی آئی چیئرمین عمران خان دے قریبی ساتھی و پی ٹی آئی دے سیکرٹری جنرل جہانگیر خان ترین دے خاندان وچ وی ارباں رُپئے دے تحفیاں دا وٹاندرا ہویا اے جہدے اُتے پی ٹی آئی چیئرمین عمران خان تے آپ جہانگیر خان ترین نے چُپ وٹی ہوئی اے۔
تفصیل دے مطابق قومی اخبار ’دی نیوز‘ وچ چھپن والی اک رپورٹ دے مطابق 2009تے 2013وچکار پی ٹی آئی دے سیکرٹری جہانگیر ترین تے اوہناں دے گھر والیاں نے اک دوجے نال 1ارب 64کروڑ 70لکھ رُپئے دی وڈی رقم دے تحفیاں دا وٹاندرا کیتا۔ دی نیوز نوں ملیاں دستاویزات وچ ایہ انکشاف ہویا کہ جس طریقے نال شریف خاندان نے 510بلین رُپئے تحفے دے طور اُتے اک دوجے نوں دِتے اوسے طرحاں جہانگیر ترین تے اوہناں دے خاندان نے وی پیسیاں دی منتقلی تے تحفیاں دا وٹاندرے لئی ٹھیک اوہی طریقا ورتیا۔
رپورٹ وچ آکھیا گیا کہ اینی وڈی گنتی وچ پیسےاں دی منتقلی بے شک قانونی تے جائز طریقیاں نال کیتی جائے پر وڈی رقم ہون کارن اوہدیاں تحقیقات ہونیاں چاہیدیاں۔ایس ضمن وچ جہانگیر خان ترین نے آکھیا کہ مینوں ٹیکس دین والیاں وچ گِنیا جاندا اے تے میں اپنے خاندان نال تحفیاں دے وٹاندرے توں لے کے ساریاں تفصیلاں اپنے اثاثیاں وچ دِتیاں نیں، اوہناں نے ہور آکھیا کہ میں اپنے گوشواریاں وچ کوئی گل نہیں لُکائی۔
اوہناں دا کہنا سی کہ میں ٹیکس دینا واں تے ایس حوالے نال میرا ریکارڈ وی بہترین اے۔ جہانگیر ترین نے دسیا کہ ایہناں تحفیاں سنے سارے تبادلیاں دیاں تفصیلاں ساڈے ٹیکس گوشواریاں وچ وی شامل کیتیاں گئیاں نیں کیونکہ میرے بال آزاد طریقے نال کاروبار کر رہے نیں ایس لئی اوہناں دیاں ٹیکس دستاویزات وچ وی ایہ شے موجود اے۔ یاد رہوے کہ پی ٹی آئی چیئرمین عمران خان نے شریف خاندان دے آپسی وچ تحفیاں دے وٹاندرے تے پیسیاں دی منتقلی بارے تنقیدی بیان دِتے سن پر ہن اوہناں دے اپنے ساتھی پی ٹی آئی دے رہنما جہانگیر ترین تے اوہناں دے گھر والیاں بارے وی کُجھ ایس طرحاں دے انکشافات ہوئے نیں جہدے اُتے پی ٹی آئی چیئرمین نے چُپ وٹ لئی اے۔
