اسلام آباد(پاکستان پوائنٹ نیوز25۔جنوری2017ء) پاکستان دے قومی اخبار ’ڈیلی ٹائمز‘ نے دعوا کیتا اے کہ وزیراعظم نواز شریف نوں دورا ڈیوس دے دوران ورلڈ اکنامک فورم نال خطاب کرن توں ایس لئی روک دِتا گیا کہ اوہناں اُتے لگے کرپشن دے الزاماں دیاں تحقیقات کیتیاں جا رہیاں نیں۔ ڈیلی ٹائمز وچ چھپن والی اک رپورٹ دے مطابق وزیر اعظم میاں محمد نواز شریف نے دورا ڈیوس دوران اپنے آپ اُتے لکھاں رُپئے خرچ کیتے پر ڈیوس وچ ہون والے اہم ورلڈ اکنامک فورم دی انتظامیا نے کرپشن الزامات دی وجہ توں وزیر اعظم نواز شریف نوں تقریب نال خطاب کرن دی اجازت نہیں دِتی۔
جہدی وجہ وزیر اعظم دا پاکستان وچ مبینہ طور اُتے میگا کرپشن وچ ملوث ہونا سی۔ رپورٹ وچ ہور دسیا گیا کہ وزیر اعظم میاں محمد نواز شریف نے ڈیوس وچ صرف سری لنکا دے ہم منصب نال ملاقات کیتی جہدے بعد اوہ کسے وی رہنما نال ملاقات یاں کسے اجلاس وچ رلت نہیں ہو ئے۔ وزیر اعظم دے ایس دورے دوران پاکستان دی جگ ہنسائی ہون اُتے پاکستانی لوکائی ڈاڈھے غم و غصے دا شکار اے۔
ایہدے اُلٹ سابق آرمی چیف (ر) راحیل شریف نے نہ صرف فورم وچ رلت کیتی بلکہ اوہناں نے کئی تقریباں تے مباحثیاں وچ حصہ لین دے نال نال خطاب وی کیتا۔یاد رہوے کہ ورلڈ اکنامک فورم دا اجلاس ہر سال ڈیوس وچ ہوندا اے جہدے وچ مختلف ملکاں دے سربراہان رلت کردے نیں۔ ڈیلی ٹائمز نے اپنی رپورٹ وچ ہور دسیا کہ وزیر اعظم نواز شریف ایس اجلاس دے سپانسرز ولوں کوئی دعوت نامہ نہ ملن مگروں وی لکھاں رُپئے خرچ کر کے ڈیوس چلے گئے۔
پر ڈیوس پہنچدے ای اوہناں نوں اودوں مایوسی دا ساہمنا کرنا پیا جدوں وزیر اعظم نواز شریف نوں اجلاس نال خطاب دی اجازت نہیں دِتی گئی۔ وزیر اعظم نواز شریف سوئٹزر لینڈ وچ فائیو سٹار ہوٹلاں وچ رہے۔ سرکاری حکام نے وی ایہ دسیا کہ وزیر اعظم صرف پرچا کاراں نال گل بات کردے ڈاڈھی مایوسی وچ لندن ٹُر گئے سن۔ ایس توں وکھ ایہ گل وی ذکر جوگ اے کہ وزیر اعظم ڈیوس جان توں پہلے اپنی تقریر وی تیار کر چکے سن پر اوہناں نوں تقریر دی اجازت نہیں دِتی گئی۔ دوجے پاسے وزیر اعظم دے ترجمان نے ایس حوالے نال گل کرن توں صاف انکار کر دِتا اے۔
