پشاور(پاکستان پوائنٹ نیوز23۔جنوری2017ء) آکھدے نیں کہ ہر کسے دی موت دا ویلا تے تھاں مِتھی جا چکی اے، ایہ وی آکھیا جاندا اے کہ موت اپنا راہ آپ لبھ لیندی اے پر پشاور دے اک واسی نے موت نوں 7وار دھوکھا دِتا۔ جی بالکل! پارا چنار دھماکے وچ بچ جان والے محمد حسین دی قسمت نے پہلی وار نہیں بلکہ 7ویں وار اوہدا ساتھ دِتا۔ محمد حسین ایس توں پہلے وی 6 وار موت دیاں اکھاں وچ مٹی پا چکیا اے۔
محمد حسین دا کہنا اے کہ پچھلے چھ ورھیاں توں میں کئی آپ مارو حملے ہوندے ویکھے تے اپنیاں اکھاں ساہمنے لوکاں نوں فوت ہوندے ویکھیا۔ محمد حسین پارا چناردی اوس سبزی منڈی دا صدر اے جتھے پچھلے دِنا آپ مارو حملا ہویا سی۔ 40ورھیاں دے محمد حسین نے دسیا کہ بم ٹماٹراں دے سٹاک کول اک کریٹ وچ رکھیا گیا سی جدکہ میں ایس کریٹ توں تقریبن تن میٹر ای دور کھلوتا ساں۔
اوس دن بارش ہو رہی تے سردی وی بہت سی۔ محمد حسین دا کہناسی کہ عام طور اُتے 12توں 15سوبندے ایس مارکیٹ وچ آﺅندے نیں پر دھماکے والے دن سردی پاروں مارکیٹ وچ 5سو دے نیڑے بندے سن۔ محمد حسین دا کہنا سی کہ مارکیٹ وچ اچانک دھواں کِھلر گیا، جدوں دھواں کِھلریا تے میں ویکھیا کہ مارکیٹ وچ ہر تھاں لوک رولا پا رہے نیں تے پریشانی وچ اِدھر اُودھر نس رہے نیں۔
محمد حسین نے دسیا کہ اسیں مارکیٹ وچ کسے باہرلے بندے نوں نہیں ویکھیا جدکہ حیرانگی دی گل ایہ اے کہ ایس مارکیٹ وچ توں دھماکے توں کجھ دیر پہلے ای بم ڈسپوزل سکواڈ تے سراغ رساں کتیاں نے سرچنگ وی کیتی سی پر پچھلے دو مہینیاں توں کوئی دھمکی نہیں ملی تے نہ ای خطرے دی گھنٹی وجی سی۔ محمد حسین نے دسیا کہ اوہ 6وار پہلے وی ایسے طرحاں موت توں بچ گیا سی جدکہ پارا چنار دھماکے وچ اوہنوں چریٹھ تک نہیں لگی۔
