پاکستان افغانستان نال مذاکرات وچ سخت موقف اپنان لئی تیار

مذاکرات آرمی چیف دے دورا افغانستان دوران ہون گے، واشنگٹن دیاں پالیسیاں بدل کے پاکستان نوں کئی غلط فہمیاں دور کرن دا موقع ملے گا: وسیلے

پاکستان افغانستان نال مذاکرات وچ سخت موقف اپنان لئی تیار
مذاکرات آرمی چیف دے دورا افغانستان دوران ہون گے، واشنگٹن دیاں پالیسیاں بدل کے پاکستان نوں کئی غلط فہمیاں دور کرن دا موقع ملے گا: وسیلے

اسلام آباد(پاکستان پوائنٹ نیوز23۔جنوری2017ء) پاکستان آن والے ہفتیاں وچ افغانستان نال مذاکرات وچ سخت موقف اپنان دی تیاری کر رہیا اے ۔ ایہ مذاکرات آرمی چیف دے دورا افغانستان دے موقع اُتے ہون گے۔ جنرل قمر جاوید باجوہ نوں آرمی چیف بنن دے بعد افغان صدر اشرف غنی نے کابل دے دورے دی دعوت دِتی سی، بھاویں جنرل باجوہ نے اصولی طور اُتے ایہ دعوت قبول کر لئی اے پر اوہ ایس دورے لئی چنگے ویلے دی اُڈیک وچ نیں۔

اک سینئر سکیورٹی عہدیدار نے دسیا کہ امریکا دی نویں انتظامیا ولوں افغانستان اُتے موقف واضح ہون مگروں آرمی چیف افغانستان دا دورا کرن گے پر اوہ جدوں وی افغانستان جان گے اوہ افغان قیادت نوں اک واضح پیغام دین گے کہ اپنیاں ناکامیاں اُتے پاکستان نوں ذمے وار قرار دینا بند کرو۔ امید کیتی جا رہی اے کہ جنرل قمر جاوید باجوہ افغان قیادت نوں دو ٹوک انداز وچ دَسن گے کہ پاکستان ہن کسے وی گروہ دی نہ پشت پناہی تے نہ ای کوئی تھاں دے رہیا اے۔

ایس توں وکھ اوہ ایس گل دے ثبوت وی پیش کرن گے کہ کیویں افغان حکومت دے کئی عناصر پاکستان خلاف ہون والے حملیاں دی حمایت کردے نیں۔ عہدیدار دے مطابق ایہناں ساریاں گلاں دے مگروں وی پاکستان افغانستان وچ لمے چِر توں جاری امن دیاں کوششاں دی حمایت کرے گا۔ یاد رہوے کہ جنرل قمر نے جدوںتوں فوج دی کمان سنبھالی اودوں توں اوہناں نے افغانستان نال رابطے پکے کرن دی کوشش کیتی اے۔

اوہناں نے دو ہفتیاں دے دوران افغان صدر اشرف غنی نال دو وار فون اُتے گل بات کیتی، پہلی وار نویں سال دے شروع جدکہ دوجی وار کابل بم حملیاں دی مذمت لئی ، ایس موقعے اُتے اوہناں نہ صرف بم حملیاں دی نندیا کیتی بلکہ افغانستان نوں سانجھے چیلنجاں نال نبڑن لئی مدد دی پیشکش وی کیتی۔ ایس توں وکھ آرمی چیف نے افغان صدر توں اک دوجے اُتے الزام لان دے عمل (بلیم گیم) روکن لئی درخاست وی کیتی، اوہناں دا کہنا سی کہ ایس قسم دا رویہ کسے وی ملک دے مقصداں لئی ٹھیک نہیں اے۔

پر اوہناں دی ایہ کوشش کامیاب نہیں ہوئی تے افغان صدر نے فیر الزام لا دتے اصرار کیتا کہ اوہناں دا ملک دوویں ملکاں دے مستقبل دے حوالے نال پاکستان نال سنجیدا گل بات دا خاہشمند اے۔ اودھر فارن آفس دے اک عہدیدار نے ناں نہ دَسن دی شرط اُتے دسیا کہ پاکستان وی افغانستان نال سنجیدا گل بات کرنا چاہندا اے پر اوہناں نے واضح کیتا کہ سنجیدا تے معنی خیز مذاکرات دے حوالے نال پاکستان دا ارادادوویں ملکاں وچکار اختلافات نوں دور کردا اے۔