اسلام آباد(پاکستان پوائنٹ نیوز23۔جنوری2017ء) حکومت نے بھارت ولوں سندھ طاس سمجھوتے دی خلاف ورزیاں دی صورت وچ قانونی جنگ لڑن لئی اٹارنی جنرل دی سربراہی وچ ٹاسک فورس بنا دِتی اے۔ وسیلیاں دے مطابق اٹارنی جنرل اشتر علی اوصاف دی سربراہی وچ بنائی گئی ٹاسک فورس سندھ طاس سمجھوتے اُتے عمل درآمد یقینی بنان لئی تے سمجھوتے دی خلاف ورزی کرن دی صورت وچ معاملا عالمی بنک نال چُکن لئی بنائی گئی۔
وسیلیاں نے دسیا کہ ٹاسک فورس اپنی پہلی رپورٹ 25جنورں نوں وزیر اعظم میاں محمد نواز شریف نوں دیوے گی ،ٹاسک فورس رپورٹ دے چانن وچ سندھ طاس سمجھوتے دا عالمی بنک دے سینئر وائس پریذیڈنٹ ساہمنے رکھیا جائے گا جہدی 26جنوری نوں پاکستان آن دی امید اے۔ وسیلیاں دے مطابق پاکستان حکومت چاہندی اے کہ عالمی بنک ضامن دے طور اُتے سندھ طاس سمجھوتے وچ اپنا کردار ادا کرے تے ایس معاملے وچ بھارت ولوں سمجھوتے دی خلاف ورزی دا نوٹس لے کے اوہنوں سمجھوتے اُتے پوری طرحاں عمل درآمد دا پابند بنائے۔
وسیلیاں نے ہور دسیا کہ ٹاسک فورس نے اپنی مڈھلی رپورٹ وچ سفارش کیتی اے کہ عالمی بنک بھارت نوں پابند کر کے کہ آن والے ویلے وچ دریائے جناب، ستلج تے سندھ اُتے توانائی تے آبپاشی دے کسے وی منصوبے بارے حکومت پاکستان نوں پہلے اطلاع دِتی جائے گی تے منصوبے دے ڈرائنگز تے ڈیزائنز دِتے جان تاں جے ایس گل اُتے عمل کیتا جائے کہ ذکر کیتے گئے منصوبے نال سندھ طاس سمجھوتے دی خلاف ورزی نہیں ہو رہی اے۔ وسیلیاں دے مطابق رپورٹ وچ ہور سفارش کیتی گئی اے کہ جے کسے منصوبے نال سمجھوتے دی خلاف ورزی ہو رہی تے اوہ عالمی بنک آپ اوہدا نوٹس لووے تے بھارت سرکار نوں اوہدے توں منع کرے پر جے بھارت سرکار باز نہ آئے تے بنک معاملا ثالثی ٹربیونل ساہمنے رکھے۔
