اسلام آباد(پاکستان پوائنٹ نیوز14۔جنوری2017ء) نجی ٹی وی چینل اُتے اپنے پروگرام اندر گل بات کردے ہوئے مشہور پرچا کار ڈاکٹر شاہد مسعود نے شریف خاندان وچکار موجود اختلافات دا راز بیان کر دِتا۔ تفصیل دے مطابق ڈاکٹر شاہد مسعود دا کہنا سی کہ ملکوں باہر جاندے ہوئے شہباز شریف، نواز شریف نال جہاز وچ بِہن دی بجائے ملک وچ ای رہنا چاہندے سن، شہباز شریف دے خاندان نے دسیا کہ ساڈے والد نوں بیگم کلثوم نواز نے مجبور کیتا کہ اوہ وی جہاز وچ بَہن، اوہناں نوں جان بُجھ کے جہاز وچ بٹھایا گیا تاں جے اوہ ہیرو نہ بن جان۔
ڈاکٹر شاہد مسعود نے آکھیا کہ شاید پرویز مشرف وی ایہو چاہندا سی کہ شہباز شریف نہ جائے۔ اوہناں نے دسیا کہ اجے پاناما پیپرز وچ نواز شریف دے گھر والیاں دا ناں آن اُتے شہباز شریف دا خاندان قدرے مطمئن اے کہ ایس سارے معاملے وچ اوہناں دے خاندان دا ناں نہیں لِتا جا رہیا۔ ڈاکٹر شاہد مسعود نے دسیا کہ دو ویں بھراواں وچکار بھاویں بہت اختلافات نیں پر کدی وی شہباز شریف نے نواز شریف نال بدتمیزی نہیں کیتی تے نہ ای اوہناں ساہمنے کدی کُھل کے کوئی گل کیتی کیونکہ بھراواں وچ محبت اے۔
ڈاکٹر شاہد مسعود دا کہنا سی کہ دھرنے دوران وی نواز شریف نے آکھیا سی کہ شہباز شریف استعفی دے دین جہدے اُتے شہباز شریف دی گھر والی تہمینہ درانی نے احتجاج کیتا تے آکھیا کہ ہر وار اسیں تے ساڈا خاندان ای قربانی کیوں دیوے؟
