کوئٹہ دُکھانت کمیشن اُتے 18جنوری نوں جواب جمع کراواں گا: وفاقی وزیر داخلا چودھری نثار

کوئٹہ دُکھانت کمیشن اُتے 18جنوری نوں جواب جمع کراواں گا: وفاقی وزیر داخلا چودھری نثار

کلر سیداں(پاکستان پوائنٹ نیوز14۔جنوری2017ء) وفاقی وزیر داخلا چودھری نثار علی خان دا کہنا اے کہ پروفیسر سلمان حیدر دے لاپتا ہون مگروں اوہناں دی بھال جاری اے۔ اوہناں نے دسیا کہ میں معاملے دی آپ نگرانی کر رہیا واں۔ کلر سیداں وچ میڈیا نال گل بات کردے ہوئے وفاقی وزیر داخلا چودھری نثار علی خان نے آکھیا کہ اسلام آباد توں پروفیسر حیدر دے لاپتا ہون دا پتا اے۔

اوہناں دا کہنا سی کہ میں فقہی اختلاف اُتے گل کیتی تے ہنگاما ہو گیا۔ اوہناں نے آکھیاکہ لاہور وں وی اک بندے دے لاپتا ہون دی رپورٹ ملی اے، ایہناں لاپتا بندیاں نوں رہا کروایا جائے گا۔ اوہناں دا کہنا سی کہ لاپتا ہون والے بندیاں دے معاملے دی آپ مانیٹرنگ کر رہیا واں۔ وزیر داخلا نے دسیا کہ لاپتا ہون والے بندیاں بارے معلومات اگانہ ودھ رہیاں نیں، سکیورٹی ادارے وی ایس حوالے نال کوششاں کر رہے نیں ، اسیں چاہندے آں کہ لاپتا ہون والے بندے واپس آ جان۔

وزیر داخلا نے آکھیا کہ پیپلز پارٹی نوں میرے توں تکلیف اے ایہ سارے جاندے نیں۔ پیپلز پارٹی دے کُجھ لوکاں دا رونا دھونا جاری رہندا اے۔ اوہناں دا کہنا سی کہ پیپلز پارٹی دے لوکاں ولوں لائے گئے الزاماں دی کوئی وقعت نہیں، پیپلز پارٹی دا کہڑا لیڈر اپنے دور وچ کالعدم جماعتاں دے لوکاں نال نہیں ملیا؟ اوہناں نے آکھیا کہ میری تقریرنوں بغیر پڑھے کُجھ لوکاں نے اپنے اپنے مطلب کڈھ لِتے جو کہ زیادتی تے ناانصافی اے۔

اوہناں نے آکھیا کہ پاکستان اندر ہن دہشت گرد تنظیماں دی کوئی گنجائش نہیں رہی۔ دہشت گرد تنظیماں تے فرقا وارنا تنظیماں وچ فرق اے۔ ایہ گل ریکارڈوچ اے۔ چودھری نثار علی خان نے آکھیا کہ ہر شے نوں مولانا لودھیانوی نال جوڑنا کتھوں دا انصاف اے؟ فرقا وارانا بنیاداں اُتے کالعدم قرار دِتیاں گئیاں جماعتاں دے لوک ہن وی پاکستان وچ موجود نیں، کیہ ساجد نقوی یاں موسوی صاحب نوں دہشت گرد تنظیماں نال جوڑیا جا سکدا اے؟ ایہ دوویں شخصیتاں وطن نال محبت کرن والیاں نیں، پر اوہناں دیاں تنظیماں کالعدم نیں۔

اوہناں دا کہنا سی کہ اک دو جماعتاں ایس طرحاںدیاں نیں جو ہر شے دی ذمے واری میرے اُتے پا دیندیاں نیں۔ چو دھری نثار علی خان نے دسیا کہ ملٹری کورٹس دے حوالے نال اک اجلاس ہویا۔ ملٹری کورٹس اُتے سیاسی جماعتاں نال گل بات وی جاری اے۔ اوہناں نے دسیا کہ بابر اعوان نال میرا ذاتی تعلق اے، ایہو وجہ اے کہ اوہ کسے وی جماعت وچ ہون اوہناں نال گل بات ہوندی رہندی اے۔

ایس لئی بابر اعوان نال میری ایہ پہلی ملاقات نہیں سی۔ کوئٹہ دُکھانت کمیشن بارے اوہناں نے دسیا کہ میرے وکیل نے آکھیا کہ وزارت داخلا دے ساڈھے تن ورھیاں دی کارکردگی نوں وی دسیا جائے۔ اوہناں نے آکھیا کہ کمیشن دی رپورٹ بارے سپریم کورٹ اندر 18جنوری وچ جواب جمع کراواں گے، دہشت گردی خلاف جنگ، اندرونی سکیورٹی بارے رپورٹ وی سپریم کورٹ وچ پیش کیتی جائے گی۔ اوہناں دا کہنا سی کہ جے عدالت نے اجازت دِتی تے رپورٹ میڈیاں نوں دِتی جائے گی۔