اسلام آباد(پاکستان پوائنٹ نیوز13۔جنوری2017ء) انسداد دہشت گردی عدالت نے ججز نظر بندی کیس وچ سابق صدر پرویز مشرف نوں 9فروری نوں عدالت وچ پیش ہون دا حکم دے دِتا اے۔ دوجے پاسے اے ٹی سی وچ سابق صدر پرویز مشرف دی ملک واپسی دی درخاست وی دائر کیتی گئی۔ پرویز مشرف نے وکیل راہیں انسداد دہشت گردی عدالت وچ درخاست جمع کروائی گئی۔ درخاست گزار دا کہنا سی کہ مشرف ملک واپس آنا چاہندے نیں، درخاست وچ استدعا کیتی گئی کہ پرویز مشرف وی ملک واپسی اُتے سکیورٹی انتظامات مکمل کیتے جان۔
پراسیکیوٹر نے دسیا کہ وزارت داخلا پہلے ای پرویز مشرف دی سکیورٹی لئی یقین دہانی کرا چکی اے۔ ایس دوران عدالت نے سابق صدر پرویز مشرف دی ملک واپسی اُتے فول پروف سکیورٹی دین دی درخاست منظور کر لئی جدکہ سیکرٹری داخلا تے آئی جی اسلام آباد نوں سکیورٹی یقینی بنان دا حکم وی جاری کیتا۔ عدالت نے حکم دِتا کہ کیس دی آن والی سنوائی اُتے سکیورتی انتظامات مکمل کیتے جان گے۔ عدالت نے آکھیا کہ جے سابق صدر پرویز مشرف آن والی سنوائی اُتے وی پیش نہ ہوئے تے اوہناں نوں اشتہاری قرار دِتا جائے گا۔
