آن والے الیکشن وچ وی مسلم لیگ (ن) جِتے گی: وزیر اعظم نواز شریف

جھ سیاستدان جھوٹھ ضرور بولدے نیں بلکہ بغیر ناغے جھوٹھ بولدے نیں۔ گوشت دا وی ناغا ہوندا اے پر ایہ جھوٹھ بولن دا ناغا نہیں کردے، میں اوہناں نوں آکھنا واں کہ ترقی دا راہ نہ روکن:وزیر اعظم دا صحت کارڈ ونڈن دی تقریب نال خطاب

آن والے الیکشن وچ وی مسلم لیگ (ن) جِتے گی: وزیر اعظم نواز شریف
جھ سیاستدان جھوٹھ ضرور بولدے نیں بلکہ بغیر ناغے جھوٹھ بولدے نیں۔ گوشت دا وی ناغا ہوندا اے پر ایہ جھوٹھ بولن دا ناغا نہیں کردے، میں اوہناں نوں آکھنا واں کہ ترقی دا راہ نہ روکن:وزیر اعظم دا صحت کارڈ ونڈن دی تقریب نال خطاب

نارووال(پاکستان پوائنٹ نیوز12۔جنوری2017ئء) وزیر اعظم نواز شریف نے آکھیا اے کہ آن والے الیکشن وچ وی مسلم لیگ (ن) جِتے گی، بجلی دے بحران اُتے قابو پالیا، 2018وچ بجلی دی لوڈشیڈنگ ختم ہو جائے گی، ملک اندروں دہشت گردی دا جن وی ختم کر دِتا اے، کجھ سیاستدان جھوٹھ بولدے نیں بلکہ ناغا کیتے بغیر بولدے نیں، گوشت دا وی ناغا ہوندا پر ایہ جھوٹھ بولن دا ناغا نہیں کردے، اوہناں نوں کہنا واں کہ ترقی دا راہ نہ روکو۔

تفصیل دے مطابق ہیلتھ کارڈ ونڈن دی تقریب نال خطاب کردے ہوئے وزیر اعظم نواز شریف دا کہنا سی کہ سیاسی مقصداں لئی اسیں ایتھے آﺅندے جاندے رہندے آں، پر اج اک نیک مقصد لئی نارووال آن اُتے بہت خش آں، خدمت خلق نال مینوں جِنی خشی ملدی اے اونی کسے ہور کم نال نہیں ملدی۔ اوہناں دا تقریب نال خطاب وچ کہنا سی کہ نارووال دے کسے بال نوں جے کینسر ہوندا اے، کسے نوں دل دا روگ اے، بہت سارے روگیاں کول دوا دے پیسے نہیں ہوندے پر اوہ ہن اپنا علاج آرام نال کروا سکن گے۔

اوہناں نے آکھیا کہ 1لکھ 60ہزار خانداناں نوں ہیلتھ کارڈ دِتے جا رہے نیں۔ لوک علاج لئی اپنیاں جائیداداں ویچ دیندے نیں۔ اوہ بال جہناں دی پڑھائی لکھائی دی عمر اے پیسے نہ ہون کارن نوکریاں اُتے لگ جاندے نیں، لوکاں کول علاج دی سہولت نہیں جس پاروں اوہ اپنا گھر بار ویچ دیندے نیں۔ بال مشقت کر رہے نیں، بال نکیاں موٹیاں نوکریاں لبھدے نیں، دُکان اُتے بھانڈے صاف کردے نیں پر ایہناں معاشرتی روگاں تے محرومیاں دا علاج لبھنا پئے گا۔

اوہناں نے آکھیا کہ شہباز شریف سائرہ افضل تارڑ، مریم نواز، سیکرٹری ہیلتھ، سلمان رفیق تے ہور ایس نیک کم وچ شامل نیں۔ ایس عوامی خدمت دا ثواب بہت اے۔ اوہناں دا کہنا سی کہ ہیلتھ کارڈ وچ سرکاری تے نجی ہسپتال دوویں شامل نیں، جے علاج اُتے بہتے پیسے خرچ ہوئے تے حکومت ہور پیسے دیوے گی۔ بیت المال پیسے دیوے گا۔ اوہناں نے مریم نواز دا پیغام پہنچایا کہ مریم نواز وی ایس معاملے وچ بڑی دلچسپی لیندیاں نیں۔

وزیر اعظم نے آکھیا کہ ہیلتھ کارڈ اک وڈے مقصد لئی جاری کیتے گئے نیں، ایس علاج معالجے وچ آپریشن تے انجیوگرافی، انجیو پلاسٹی وی شامل اے۔ اوہناں نے آکھیاکہ مسلم (ن) آن والے ویلے وی کامیابی حاصل کرے گی۔ بجلی دا بحران ختم کر دِتا گیا اے۔ 2013وچ بجلی دی 16.16گھنٹے لوڈشیڈنگ ہوندی سی پر ہن بہت تبدیلی آئی اے۔ اوہناں دا کہنا سی کہ 2018وچ لوڈشیڈنگ ختم کر دِتی جائے گی، 2013وچ دہشت گردی وی عروج اُتے سی، دہشت گردی دا جن ختم کر دِتا اے۔

وزیر اعظم نے آکھیا کہ کجھ سیاستدان جھوٹھ ضرور بولدے نیں بلکہ بغیر ناغے جھوٹھ بولدے نیں۔ گوشت دا وی ناغا ہوندا اے پر ایہ جھوٹھ بولن دا ناغا نہیں کردے، میں اوہناں نوں آکھنا واں کہ ترقی دا راہ نہ روکن۔ وزیر اعظم دا اپنے خطاب وچ کہنا سی کہ ملک اندر بجلی دے کارخانے لگ رہے نیں، پاکستان دی سٹاک مارکیٹ ایشیا دی بہترین سٹاک مارکیٹ اے۔ اوہناں دا کہنا سی کہ پاکستان چالو ورھے 5.5فیصد گروتھ کرے گا۔ اوہناں نے آکھیا کہ جے مخالف چنگے کماں وچ ہتھ نہیں ونڈا سکدے فیر ترقی دا راہ وی نہ روکن۔وزیر اعظم نے ایس موقعے اُتے اپنے مخالفاں نوں نصیحت کیتی کہ تُسیں انج دے پوائنٹ اُتے نہ جاﺅ جو تہاڈے لئی وی بہتر نہ ہوئے۔