اسلام آباد(پاکستان پوائنٹ نیوز11۔جنوری2017ء) سپریم کورٹ پاناما لیکس بارے درخاستاں دی سنوائی دا سلسلا جاری اے۔ سنوائی دے دوران حضرت عمر رضی اللہ تعالی عنہ دے دور حکومت دے حوالے نال اک انصاف دے قصے دا ذکر وی کیتا گیا۔ تفصیل دے مطابق سپریم کورٹ دے باہر میڈیا نال گل بات کردے ہوئے پی ٹی آئی رہنما فواد چودھری نے آکھیا کہ عدالت وچ نعیم بخاری دے جان مگروں پاناما لیکس کیس دی سنوائی دے دوران جسٹس آصف سعید کھوسہ نے ریمارکس دِیندے ہوئے آکھیا کہ جدوں عمر بن خطاب رضی اللہ تعالی عنہ کولوں اوہناں دی چادر دا حساب منگیا گیا تے اوہناں نے ایہ نہیں آکھیا سی کہ الزام لان والا ایہنوں ثابت وی کرے۔
اوہناں نے دسیا کہ اج عدالت وچ جدوں شیخ رشید دلائل دے رہے سن تے ایس دوران اوہناں نے آکھیا کہ حضرت عمر بن خطاب رضی اللہ تعالی عنہ مسجد وچ گئے تے لوکاں نے آکھیا کہ چادر دا حساب دیو۔ اجے اوہناں نے اینا ای آکھیا سی کہ چیف جسٹس آصف سعید کھوسہ نے ریمارکس دِتے کہ حضرت عمر بن خطاب نے ایہ نہیں سی آکھیا کہ ثبوت دینا دوجی پارٹی دا کم اے۔ فواد چودھری دا کہنا سی کہ ہن تک دی کارروائی دا حاصل ایہو اے کہ ثبوت دینا وزیر اعظم دا کم اے کیونکہ خلیفہ عمر بن خطاب نے وی الزام لگن اُتے آپے ای اوہدا جواب دِتا سی۔
