اسلام آباد(پاکستان پوائنٹ نیوز11۔جنوری2017ء) سپریم کورٹ وچ پاناما کیس بارے درخاستاں اُتے سنوائی دا سلسلا جاری اے۔ تفصیل دے مطابق پاناما کیس وچ پی ٹی آئی دے وکیل نعیم بخاری نے اج اپنے دلائل مکمل کر لئے نیں، جہدے بعد عوامی مسلم لیگ دے سربراہ شیخ رشید نے پاناما کیس وچ اپنے دلائل دینے شروع کر دِتے۔ سپریم کورٹ وچ دلائل دیندے ہوئے شیخ رشید نے آکھیا کہ عدالت سبھ کُجھ جاندی اے اسیں صرف مدد لئی آئے آں۔
اوہناں نے آکھیا کہ جے کوئی کسے دے سائے ہیٹھ اے تے کفالت ہیٹھ ای آکھوائے گا۔ نواز شریف پاناما کیس وچ براہ راست ملوث نیں، وزیر اعظم دی کفالت ہیٹھ دو بندے نیں تے اوہ دو بندے اوہناں دی بیوی تے اوہناں دی دھی مریم نواز نیں۔ شیخ رشید نے آکھیاکہ اسحاق ڈار نے ارباں رُپئے دبئی منتقل کرن دا اعتراف کیتا اے۔ قطری شہزادہ نواز شریف لئی ریسکیو 1122اے۔
شیخ رشید دے دلچسپ دلائل اُتے عدالت وچ ہاسا چھٹ پیا ۔ جسٹس شیخ عظمت نے ایس دوران ہَسن والیاں اُتے خفگی دا وکھالا کردے ہوئے آکھیا کہ عدالت وچ موجود لوک سنجیدا ہون، نہیں تے عدالت آپ سنجیدا کرے گی۔ جہدے بعد شیخ رشید نے اپنے دلائل جاری رکھدے ہوئے آکھیا کہ قطری خط بیان حلفی دے بغیر اے۔ قانون دے مطابق زبانی ثبوت براہ راست ہونا چاہیدا۔ اوہناں دا کہنا سی کہ سُنی سُنائی گل دا کوئی ثبوت نہیں ہوندا۔
اوہناںد ا کہنا سی کہ قطری خط سُنیاں سُنائیاں گلاں نیں تے ایہو وجہ اے کہ قطری خط دی حیثیت اک ٹشو پیپر توں ودھ نہیں اے۔ شیخ رشید نے آکھیا کہ ایس کیس پچھے اصل بندا سیف الرحمان اے جدکہ قطری شہزادہ مین آف دی میچ اے۔ اپنے دلائل دے دوران شیخ رشید نے کئی عدالتی فیصلیاں دا حوالا وی دتا۔
