لاہور ہائی کورٹ نے وزیر داخلا نوں نادرا اجلاس دی صدارت توں ڈک دِتا

لاہور(پاکستان پوائنٹ نیوز10۔جنوری2017ء) لاہور ہائی کورٹ نے وزیر داخلا چودھری نثار علی خان نوں نادرا اجلاس دی صدارت کرن توں ڈک دِتا اے۔ تفصیل دے مطابق لاہور ہائی کورٹ نے ایڈووکیٹ اویس الرحمان ولوں دائر درخاست اُتے حکم جاری کردے ہوئے آکھیا کہ نادرا آپ مختار ادارا اے، ایس لئی وزیر داخلا چودھری نثار نوں حق حاصل نہیں کہ اوہ نادرا دے اجلاساں دی صدارت کرن۔ ایڈووکیٹ اویس الرحمان دی دائر درخاست وچ ہور اپیل کیتی گئی اے کہ نادرا بورڈ دے 8ممبراں دی غیر قانونی تقرری کیتی گئی اے ایس لئی اوہناں نوں عہدیاں توں ہٹایا جائے۔ جہدے بعد لاہور ہائی کورٹ نے وزیر داخلا چودھری نثار علی خان نوں اگلے نوٹس تک نادرا دے اجلاس دی صدارت توں ڈَک دِتا اے۔