کراچی(پاکستان پوائنٹ نیوز09۔جنوری2017ء) کراچی توں گوادر، ایران تے دبئی تیکر فیری سروس چلان دے منصوبے وچ سرمایار کاری لئی صرف اک کمپنی ساہمنے آ سکی تے اوہ وی سرکاری اے پر کسے نجی کمپنی نے دلچسپی دا وکھالا نہیں کیتا جہدی وجہ توں فیری سروس منصوبے دی ناکامی دا خدشا اے۔ یاد رہوے کہ فیری سروس دا اعلان اکتوبر 2015وچ کیتا گیا سی تاں جے پاکستان توں ایران و عراق جان والے زائرین نوں محفوظ راہ دِتا جا سکے، ابتدائی منصوبا کراچی توں گوادر،تے گوادر توں ایران 400توں 600مسافراں دی گنجائش رکھن والے دو فیری سروسز چلان دا سی، ایہ 18گھنٹیاں دا پَندھ زمینی راہ توں مہنگا پر فضائی پَندھ توں سستا ہووے گی پر لینڈ روٹ دے مقابلے وچ ایہ زیادا محفوظ ہووے گی۔
ایہ منصوبا وزارت پورٹس اینڈ شپنگ نے تیار کیتا جہدے تحت مسافر نال کارگو سروس وی شروع کیتی جانی سی، ایس منصوبے وچ جدید سفری سہولتاں دین دا فیصلا کیتا گیا سی، منصوبے اُتے پاکستان دے ایرانی ود وبئی حکام نال مذاکرات ہوئے جو کامیاب رہے پر ایہ منصوبا اوس ویلے ناکام ہوندا نظر آیا جدوں وزارت پورٹس اینڈ شپنگ نے فیری سروس چلان لئی درخاستاں منگیاں پر3مہینیاں وچ صرف اک کمپنی نے فیری سروس چلان وچ دلچسپی دا وکھالا کیتا، جہنوں اوہدا لائسنس دے دتا گیا اے۔
ایس حوالے نال رابطا کرن اُتے سیکرٹری پورٹس اینڈ شپنگ خالد پرویز نے دسیا کہ ایس منصوبے وچ دلچسپی نہیں لِتی جا رہی، 1کمپنی پی این ایس سی نے درخاست دِتی سی اوہنوں لائسنس دے دِتا گیا اے، ہن ایس منصوبے نوں کامیاب بنان لئی مختلف آپشنز اُتے غور کیتا جا رہیا اے۔
