ایف بی آر نے موبائل کمپنیاں دے ورتیندڑاں کولوں ٹیکس وصولیاں اُتے نظر رکھن دا فیصلا کر لیا

اسلام آباد(پاکستان پوائنٹ نیوز06۔جنوری2017ء) فیڈرل بورڈ آف ریونیو (ایف بی آر) نے موبائل کمپنیاں دے سبسکرائبرز ولوں دو ہولڈنگ ٹیکس دےاں ٹھیک کٹوتیاں لئی ود ہولڈنگ ڈیٹا دے نظام راہیں اک نواں سسٹم لاگو کرن دا فیصلا کیتا اے۔ ایف بی آر دے سینئر حکام مطابق ٹیکس حکام نے موبائل فون ورتیندڑاں کولوں جمع کیتے گئے ٹیکس دا حساب رکھن لئی موبائل کمپنیاں ولوں اِکو ویلے ود ہولڈنگ ڈیٹا دے انضمام دے عمل اُتے کم شروع کرن دا فیصلا کیتا اے۔

سینیٹ دی قائما کمیٹی نوں بریف کردے ہوئے ایف بی آر دے سینئر حکام دا کہنا سی کہ فون کمپنیاں کولوں جمع شدا ٹیکس دے شمار نوں یقینی بنان لئی پائلٹ پراجیکٹ لانچ کرن دا اعلان کیتا اے۔ کمیٹی نوں ایف بی آر تے پاکستان ٹیلی کمیونیکیشن ولوں موبائل ورتیندڑاں کولوں جی ایس ٹی تے ڈبلیو ایچ ٹی ٹیکسز اکٹھا کرن لئی اپنائی گئی ترکیب بارے وی بریف کیتا گیا۔

کمیٹی نے موبائل ورتیندڑاں کولوں ٹیکس لین تے اوہنوں قومی خزانے وچ جمع کروان بارے سوال چُکیا۔ چیئرمین کمیٹی نے مشاہدا کیتا کہ لکھاں، کروڑاں رُپئے موبائل ورتیندڑاں کولوں جی ایس ٹی ٹیکس دے بدلے لِتے جاندے نیں، ایتھوں تیکر کہ غریب لوکائی کولوں وی جہدے اُتے ایہ ٹیکس لاگو نہیں ہوندا، لِتا جاندا اے۔ چیئرمین کمیٹی نے تشویش دا وکھالا کیتا کہ بدقسمتی نال ایف بی آر کول ٹیلی کمیونیکیشن کمپنیاں ولوں جمع کیتے گئے ٹیکس دا کوئی ریکارڈ موجود نہیں اے۔

جہدے نتیجے وچ ایف بی آر اک عام بندے نوں ریلیف دین وچ ناکام رہیا۔ کمیٹی دے ممبراں نے تجویز پیش کیتی کہ ذکر کیتے گئے معاملے دی قانون سازی کیتی جانی چاہیدی۔ ایف بی آر حکام نے وی ایس تجویز دی تائید کیتی۔ ایف بی آر حکام نے کمیٹی نوں دسیا کہ موبائل کمپنیاں ورتیندڑاں کولوں 47بلین رُپے ٹیکس دے ناں اُتے لے رہیاں نیں جدکہ چیئرمین کمیٹی دا کہنا سی کہ ٹیلی کام کمپنیاں سروسز دے ناں اُتے ورتیندڑاں کولوں گھٹو گھٹ تقریبن 81بلین لے رہیاں نیں پر پائلٹ پراجیکٹ دی لانچ دے بعد ٹیکس وصولی تے وصول کیتے گئے پیسیاں دا پورا پورا حساب رکھیا جائے گا۔ ایس لئی لانچ کیتا گیا پراجیکٹ ممکنا طور اُتے 17جنوری نوں کم شروع کر دیوے گا۔