اسلام آباد(پاکستان پوائنٹ نیوز06۔جنوری2017ء) سپریم کورٹ وچ پاناما لیکس بارے درخاستاں دی سنوائی جاری اے۔ تفصیل دے مطابق جسٹس آصف سعید کھوسہ دی سربراہی وچ 5رکنی لارجر بنچ کیس دی سنوائی کر رہیا اے۔ سنوائی دوران عمران خان دے وکیل نعیم بخاری دلائل دے رہے نیں۔ سنوائی وچ وکیل شاہد حامد دا کہنا سی کہ اسحاق ڈار دی وکالت وی میں کر رہیا واں۔ اوہناں نے آکھیا کہ وزیر اعظم خلاف الیکشن کمیشن وچ چار ریفرنسز سنوائی ہیٹھ نیں۔
الیکشن کمیشن وچ اسحاق ڈار خلاف وی درخاست سنوائی ہیٹھ اے۔ اوہناں دا کہنا سی کہ اسحاق ڈار تے مریم نواز ولوں پیش ہو رہیا واں۔ جسٹس کھوسہ نے پُچھیا کہ وزیر اعظم خلاف الیکشن کمیشن وچ ایہو معاملا سنوائی ہیٹھ اے؟ جہدے اُتے شاہد حامد نے جواب دِتا کہ الیکشن کمیشن ساہمنے وی وزیر اعظم دی نااہلی دا معاملا اے۔ جسٹس کھوسہ نے آکھیا کہ کیہ الیکشن کمیشن وچ درخاستاں سپریم کورٹ دے بعد دائر ہوئیاں یاں پہلے؟ شاہد حامد نے دسیا کہ الیکشن کمیشن وچ درخاستاں پہلے دائر ہوئیاں سن، الیکشن کمیشن وچ کیپٹن (ر) صفدر خلاف وی درخاست دائر اے۔
عدالت وچ پی ٹی آئی دے وکیل نعیم بخاری نے اپنے دلائل پیش کردے ہوئے آکھیا کہ لندن فلیٹس دے اصل مالک نواز شریف نیں تے مریم نواز دے ناں توں بے نامی فلیٹس خریدے گئے۔ اوہناں نے آکھیا کہ فلیٹس 1993توں 1996وچکار خریدے گئے، جدوں فلیٹس خریدے گئے اوس ویلے مریم نواز دی عمر گھٹ سی، دبئی وچ وی بے نامی سٹیل مل لائی گئی، مریم نواز ای لندن فلیٹس دی بینیفشری نیں۔
نعیم بخاری نے آکھیا کہ دنیا نوں وکھان لئی مریم صفدر نوں بینیفشری ظاہر کیتا گیا۔ نعیم بخاری دا کہنا سی کہ 2011وچ وزیر اعظم نے دھی نوں تن کروڑ 70لکھ رُپئے تحفے دے طور اُتے دِتے، جدوں فلیٹ خریدے گئے اودوں مریم نواز دا کوئی آمدنی دا وسیلا نہیں سی۔ 2013وچ فیر والد نے تن کروڑ توں ودھ پیسے تحفے دے طور اُتے دِتے، 2011وچ مریم نواز نے چودھری شوگر مل توں 4کروڑ 23لکھ دا قرضا لیا، 2012وچ مریم نواز نے اپنے بھرا حسن نواز کولوں 2کروڑ 89لکھ قرضا لیا۔
جسٹس عظمت نے پُچھیا کہ کیہ مریم نواز نوں چودھری شوگر مل وچ شیئر ہولڈر بنایا گیا؟ جسٹس اعجاز الحسن نے پُچھیا کہ کیہ کمپنی بارے ریکارڈ ایس ای سی پی کول موجود ہوندا اے؟ جسٹس اعجازنے نعیم بخاری نوں آکھیا کہ بخاری صاحب تہاڈیاں کاوشاں دی تعریف کردے آں پر تہاڈی گل توں بخاری صاحب مریم دے کفالت ہیٹھ ہون دا معاملا واضح نہیں ہوندا۔ نعیم بخاری نے دسیا کہ تحقیقاتی ادارے نے موزیک فرم توں آف شور کمپنیاں دیاں تفصیلاں منگیاں۔
تحققیاتی ادارے نے کمپنیاں دی ملکیت تے ہور امور بارے پُچھیا، تحقیقاتی ادارے نوں دسیا گیا کہ لندن فلیٹس کرائے اُتے نہیں دِتے گئے ایہ وی دسیا گیا کہ مریم تے اوہناں دی فیملی فلیٹس وچ رہندی اے۔ اوہناں نے آکھیا کہ سامبا بنک نے آکھیا کہ مریم ساڈی اکاﺅنٹ ہولڈر اے۔ جسٹس اعجاز نے آکھیا کہ لندن فلیٹس مریم نواز نوں کدوں تے کیویں منتقل ہوئے؟ تہاڈے کول مریم دی جائیداد منتقلی دا کوئی دستاویزی ثبوت ہے اے؟ جسٹس کھوسہ نے آکھیا کہ اک دستاویز وچ مریم نواز سامبا بنک تے منروا کمپنی نوں ظاہر کردیاں نیں، ایہ تعلق 2005دا لگدا اے۔
جسٹس اعجاز نے آکھیا کہ بخاری صاحب کیہ تہاڈے کول ایس طرحاں دیاں دستاویز موجود اے جہدے توں ثابت ہووے کہ 2006دی ٹرسٹ ڈیڈ غلط اے؟ جہدے اُتے نعیم بخاری نے آکھیا کہ جائیداد بارے کوئی دستاویز نہیں اے۔
