لاہور(پاکستان پوائنٹ نیوز05۔جنوری2017ء) گوجرانوالا دے شہری رضوان نوں محبت دا ویاہ مہنگا پے گیا، کُڑی والیاں معاف کرن لئی مُنڈے کولوں اوہدی بھین دا رشتہ منگ لیا، انکاری اُتے سارے خاندان نوں اغوا دے مقدمے وچ گرفتار کروا دِتا۔ تفصیل دے مطابق رضوان احمد نے ساندہ لاہور دی عندلیب ناں دی کُڑی نال پسند دا ویاہ کیتا، جہدا کُڑی دے ماں پیو نوں پتا لگ گیا۔
جہدے بعد اوہناں رضوان دی بھین دا رشتہ منگ لیا تے صلح لئی ایہ شرط رکھی دِتی۔ رضوان دے گھر والیاں نے انکار کیتا تے اوہدے ماں ، پیو، چاچے، بھرا تے بھین نوں اغوا دے مقدمے وچ ملوث کر کے تھانا ساندہ وچ مقدما درج کرا دِتا۔ ثریا فرزند ایڈووکیٹ دی مدد نال رضوان دے گھر والیاں نوں گوجرانوالا توں لاہور دی سیشن عدالت وچ پیش کیتاگیا۔ عدالت وچ مُنڈے دے گھر والیاں دسیا کہ اوہ وٹے سَٹے دا ویاہ نہیں کردے، ایس لئی اوہناں نوں جھوٹھے مقدمے وچ پھسا دتا گیا۔ عدالت نے دلائل سنن دے بعدپنجاں نوں ضمانت اُتے رہا کردے ہوئے ساندہ پولیس کولوں 7جنوری نوں مقدمے دا ریکارڈ منگ لیا۔
