اسلام آباد(پاکستان پوائنٹ نیوز05۔جنوری2017ء) گوادر بندرگاہ اتھارٹی دے چیئرمین دوستین جمال دین نے آکھیا اے کہ پاک چین اقتصادی راہداری منصوبے دا تیجا مرحلا مئی 2017وچ مکمل ہو جائے گا۔ تفصیل دے مطابق میڈیا نال گل بات کردے ہوئے اوہناں نے آکھیا کہ پجنگ وچ ہون والاجے سی سی دا 6واں اجلاس ایس اعتباد نال اہمیت جوگ اے کیونکہ ایہدے وچ پاکستان دے سارے صوبیاں دے حکام پوری تیاری نال رلتی ہوئے۔
اوہناں نے آکھیا کہ ایہ اوہ منصوبا اے جہدے فائدے سارے صوبیاں، اوہناں دی لوکائی تے خطے دے ہور ملکاں نوں پہنچےن گے۔ دوستین جمال نے آکھیا کہ چین پاکستان اقتصادی راہداری منصوبا دوجے مرحلے وچ داخل ہو رہیا اے جو جلدی مکمل کر لیا جائے گیا۔ اوہناں نے آکھیا کہ بلوچستان پاکستان دے کل رقبے دا 44فیصد اے تے چین پاک اقتصادی راہداری منصوبے توں سبھ توں بہتا فائدا وی ایسے صوبے نوں پہنچے گا جدکہ ایہدے راہیں ہور صوبیاں نوں وی فائدا ہووے گا۔
اوہناں نے آکھیا کہ گوادر پورٹ سبھ توں مصروف تے ڈونگھی بندرگاہواں وچ اک اے جہنوں مکمل طور اُتے فعال ہون نال پاکستان سنے خطے تے دنیا بھر وچ خشحالی آئے گی۔ چیئرمین اتھارٹی نے آکھیا کہ پچھلے دِنا وزیر اعظم میاں محمد نواز شریف نے سی پیک منصوبے دے تیجے زون دا افتتاح کیتا جہدے وچ اوہناں نے گوادر، کوئٹہ تے نوکنڈی سنے ہور علاقیاں لئی کئی منصوبیاں دا اعلان کیتا اے۔
اوہناں دا کہنا سی کہ وزیر اعظم دی ہدایت اُتے گوادر وچ اک یونیورسٹی بنائی جائے گی جہنوں چینی یونیورسٹی نال جوڑیا جائے گا جہدے وچ بلوچستان دے نوجواناں دی تعلیم لئی بہترین سہولتاں ہون ۔ دوستین نے آکھیا کہ چالو سال ایس حوالے نال چنگا سال ہووے گا کیونکہ ایہدے وچ چین پاکستان اقتصادی راہداری منصوبے دے تیجے زون دے منصوبے مکمل ہون گے۔
