ٰاسلام آباد(پاکستان پوائنٹ نیوز03۔جنوری2017ء) تحریک انصاف دے چیئرمین عمران خان نے آکھیا اے کہ مریم نواز کول نواز شریف دا پیسہ اے، پیسے دی ٹریل دَسنا نواز شریف دا کم اے ساڈا نہیں، مریم نواز مے فیئر فلیٹس دی اصل مالک سی، اسیں ثابت کراں گے کہ کوئی ٹرسٹ نہیں سی، مریم نواز ٹرسٹی نہیں بینفیشنری اونر سی، جیویں ٹرسٹ ڈیڈ جھوٹھی سی انج ای قطری خط وی جھوٹھ اے، ایف آئی اے تے ہور اداریاں دی ذمے واری اے کہ تحقیقات کرن۔
تفصیل دے مطابق اج پریس کانفرنس کردے ہوئے عمران خان دا کہنا سی کہ سپریم کورٹ وچ سُنیا سی کہ مریم نواز نوں دو کروڑ دی گڈی دا تحفہ مل گیا۔ ایتھے تے کم ای تحفیاں اُتے چلدا اے، مریم نواز ہر تھاں آکھدی اے کہ اوہ اپنے والد نال رہندی اے۔ مریم نواز کول نواز شریف دا پیسہ اے۔ اوہناں دا کہنا سی کہ مریم نواز کول پیسہ کتھوں آیا؟ مریم نواز نے ایہناں پیسیاں نوں فیملی دا پیسہ قرار دِتا، جہدا مطلب ایہ نواز شریف دا پیسہ اے، نواز شریف دا پیسہ منی لانڈرنگ کر کے باہر گیا۔
اوہناں نے آکھیا کہ 2004وچ مے فیئر فلیٹس دی قیمت چار ارب رُپئے سی۔ اوہناں نے آکھیا کہ مسلم لیگ ن دا موٹو گینگ روز آکھدااے کہ اسیں ثبوت نہیں دتے، اسحاق ڈار دا مجسٹریٹ ساہمنے بیان اے کہ پیسہ کیویں لندن گیا، جو شے فراڈ نہیں اوہ اسحاق ڈار دا حلف نامہ اے۔ عمران خان دا کہنا سی کہ ثبوتاں دے مطابق نیلسن تے نیسکول مریم نواز دیاں دی ای کمپنیاں نیں۔
عمران خان نے آکھیا کہ پنج ورھیاں وچ حسین نواز نے 74کروڑ رُپئے دِتے، قاضی فیملی نے ایس کم وچ اہم کردار ادا کیتا،مے فیئر دے چارے فلیٹاں دی قیمت 2004وچ چار ارب رُپئے سی۔ مریم نواز ای مے فیئر فلیٹاں دی حقیقی مالک اے۔ اوہناں نے آکھیا کہ اسیں آئی سی آئی جے توں پاناما کیس دے سارے کاغذ کڈھوائے نیں، کسے نے اوہناں نال رابطا نہیں کیتا، ہن دو ہفتیاں وچ دُدھ دا دُدھ تے پانی دا پانی ہو جانا چاہیدا۔
اوہناں نے آکھیا کہ پاناما لیکس وچ ناں آن والیاں وچوں کسے نے آئی سی آئی جے نال رابطا نہیں کیتا۔ اوہناں نے آکھیا کہ نواز شریف نے پارلیمنٹ تے سپریم کورٹ وچ وی جھوٹھ بولیا۔ ٹرمپ دے فون تے وکیل بدلن نال کجھ نہیں ہووے گا، ثبوت دینا اداریاں دا کم اے، سیاسی جماعت دا کم ثبوت دینا نہیں ہوندا۔ اوہناں نے آکھیا کہ ایف آئی اے تے ہور اداریاں دی ذمے واری اے کہ تحقیقات کرن، تحقیقات تے ثبوت اکٹھے کرنا ملکی اداریاں نیب، ایف آئی اے، ایف بی آر دا کم اے۔ اوہناں دا کہنا سی کہ چھابڑی والے نوں وی پتا اے کہ قطری خط فراڈ سی، سپریم کورٹ وچ جھوٹھ بولیا گیا۔ اوہناں نے آکھیا کہ جدوں قانون توڑیا جائے یاں پیسا چوری ہووے صرف سیاسی تنظیم ای اوہدی نشان کاری کردی اے۔
