ٹوبا ٹیک سنگھ(پاکستان پوائنٹ نیوز29۔دسمبر2016ء) زہریلی شراب پین دے نتیجے وچ موتاں دا سلسلا نہ رُک سکیا، اج وی تن بندے ہلاک ہوگئے،مرن والیاں دی گنتی 42ہوگئی، ڈی پی او ٹوبہ ٹیک سنگھ نے انکشاف کیتا اے کہ موتاں شراب نال نہیں افٹر شیو لوشن پین دی وجہ توں ہوئیاں، 5ملزم گرفتار ، پچھلے دیہاڑے وزیر اعلا دی انکوائری ٹیم علاقے وچ پہنچی تے مرن والیاں دے وارث وی پھٹ پئے۔
تفصیل دے مطابق زہریلی شراب جہدے جہدے حلقوں لتھی اوہ موت دی وادی وچ جا سُتا، باقی بچ جان والےاں وچوں وی کئی دی حالت خطرے وچ اے، متاثرا بندیاں دے گردیاں تے جگر نے کم کرنا وی چھڈ دِتا اے، اکثر اکھوں انھے ہوگئے۔ دوجے پاسے ڈی پی او ٹوبہ ٹیک سنگھ عثمان اکرم گوندل نے پریس کانفرنس دے دوران عجیب قصہ سنایا۔ اوہناں دا کہنا سی کہ آفٹر شیو لوشن نوں شراب بنا کے ویچیا گیا، موتاں وی ایہو لوشن پین دی وجہ توں ہوئیاں۔ اوہناں دا کہنا سی کہ مرکزی ملزم سنے ہن تیکر 5بندیاں نوں گرفتار کر لیا گیا اے۔ ایس توں وکھ پچھلے دیہاڑے وزیر اعلا پنجاب دی انکوائری ٹیم ٹوبہ ٹیک سنگھ پہنچی تے مرن والیاں دے وارثاں نے پولیس پارٹی اُتے حملا کر دِتا۔ ٹیم نے نس کے اپنیاں جاناں بچائیاں۔
