کراچی(پاکستان پوائنٹ نیوز29۔دسمبر2016ء) کراچی وچ پی ٹی آئی چیئرمین عمران خان نے شوکت خانم کینسر ہسپتال دی نینہ رکھ دِتی۔ ہسپتال دی نینہ رکھن دی تقریب نال خطاب کردے ہوئے پی ٹی آئی چیئرمین عمران خان دا کہنا سی کہ میں اپنی والدہ نوں علاج لئی باہرلے ملک لے گیا تے مینوں پتا چلیا کہ کینسر دا علاج کِنا مہنگا اے۔ اوہناں نے آکھیا کہ والدہ دے کینسر دے علاج دے بعد مینوں پتا لگا کہ پاکستان دے 90فیصد لوک کینسر د اعلاج نہیں کروا سکدے۔
عمران خان نے آکھیا کہ لاہور وچ کینسر ہسپتال تعمیر کیتا گیا، کینسر ہسپتال لئی فنڈز عام بندے نے ای دِتے سن۔ عمران خان دا کہنا سی کہ شوکت خانم ہسپتال وچ مفت علاج اُتے 26ارب رُپئے خرچ ہوئے، ساریاں نے آکھیا کہ کینسر دا علاج مفت نہیں ہو سکدا پر شوکت خانم وچ 75فیصد لوکاں دا علاج مفت ہوندا اے تے ایہ 26ارب رُپئے غریباں اُتے خرچ ہوئے۔ اوہناں نے دسیا کہ 1990وچ پنجاب حکومت کینسر ہسپتال بنان دی کوشش کر رہی سی پر ناکام ہو گئی، اوہناں ناکام تے ہونا ای سی کیونکہ وزیر اعلا پنجاب میاں نواز شریف سن۔
عمران خان نے تقریب نال خطاب وچ آکھیا کہ شوکت خانم پشاور وچ وی کم کیتا جا رہیا اے، ملک وچ جے وی آئی پی کلچر نہ ہووے تے امیراں نوں احساس ہو جائے گا کہ غریباں دا اعلاج کتھوں ہوندا اے، امیر علاج لئی باہرلے ملک چلا جاندا اے پر غریب کتھوں علاج کروائے؟ اوہناں نے دسیا کہ شوکت خانم ہسپتال وچ امیر تے غریب بندیاں وچکار فرق نہیں کیتا جاندا۔ اوہناں نے آکھیا کہ پاکستان نوں اسلامی فلاحی ریاست بنایا گیا سی، ایہ اک نظریا سی تے اسیں نظریے توں پچھانہ ہٹ گئے آں ۔
عمران خان دا کہنا سی کہ کینسر ہسپتال وچ علاج، کھان پین تے ہور ساریاں سہولتاں دِتیاں جان گیاں۔ اوہناں دا کہنا سی کہ پاکستان ایس لئی نہیں بنیا کہ ایتھے نواز شریف تے زرداری آکے بِہ جان، ملک وچ صرف اک نِکا جہیا طبقہ امیر ہو رہیا اے۔ تقریب نال خطاب وچ عمران خان نے اعلان کیتا کہ آن والے الیکشن دے بعد اوہ دل دا ہسپتال وی بنان گے۔
