کوئٹہ(پاکستان پوائنٹ نیوز26۔دسمبر2016ء) کوئٹہ وچ پاک فوج دے بلوچ ریکروٹس دی پاسنگ آﺅٹ تقریب منعقد کیتی گئی جہدے وچ آرمی چیف جنرل قمر جاوید باجوہ، ارکان اسمبلی تے اعلا سول و فوجی حکام نے رلت کیتی۔ تقریب نال خطاب کردے ہوئے آرمی چیف دا کہنا سی کہ مینوں فخر اے کہ میں بلوچستان دی لوکائی، دی خشی تے کامیابی وچ رلت آں، اوہناں نے آکھیاکہ بہت گھٹ لوک ایس گل توں جانو ہون گے کہ میرا تعلق وی بلوچ رجمنٹ نال اے۔
فوج وچ اپنے آپ نوں بلوچ آکھوان اُتے فخر محسوس کرنا واں، مینوں فخرا ے کہ اج بلوچستان دی لوکائی دی خشی تے کامیابی وچ رلت آں۔ اوہناں نے آکھیاکہ پاکستان ساڈا گھر، قبیلہ و ملک اے، بلوچستان پاکستان دا اک وڈا تے اہم صوبہ اے۔ اللہ نے بلوچستان نوں وسائل نال بھریا ہویا اے، آن والے وقتاں وچ بلوچستان دے وسائل پاروں ترقی دیاں نویاں راہواں کُھلن گیاں، اج بلوچستان دے بہادر پُتر ملک دی آواز اُتے لیبک آکھ رہے نیں، فخر اے کہ بلوچستان دے جوان وی ملک دے دفاع لئی کسے توں پچھانہ نہیں نیں۔
اوہناں نے آکھیا کہ بلوچستان دے کئی جواناں نوں ایف سی، پاک فوج، پولیس تے ہور اداریاں وچ شامل کیتا گیا، دشمن بلوچستان وچ رکاوٹ بن رہے نیں، بلوچستان دی لوکائی ملک دشمناں نوں رَد کر چکی اے۔ آرمی چیف دا کہنا سی کہ ساڈی دشمنی صرف پاکستان دے دشمناں نال اے، جو لوک دشمناں دیاں سازشاں دا شکار نیں اوہناں لئی ساڈے بوہے ہمیشہ کُھلے نیں۔ آرمی چیف نے آکھیا کہ اوہ ویلا دور نہیں جدوںدشمن اپنے انجام نوں پہنچے گا۔
اوہناں دا کہنا سی کہ سی پیک ویلے سِر مکمل ہو کے خطے نوں نویں دور وچ داخل کرے گا۔ اوہناں نے آکھیا کہ بلوچستان دی ترقی وی ساڈے ساریاں دی پہلی ترجیح اے، بلوچستان وچ وی آن والے ویلے دوران ہور ترقی ہووے گی کیوں جے بلوچستان دی ترقی ساڈی پہلی ترجیح اے۔ اوہناں نے آکھیا کہ ساڈے بالاں دا کل روشن اے۔
